Opozita “kërcënon” me bojkot, Konjufca: Të arrijmë kompromis

Kryetari i Kuvendit të Kosovës, Glauk Konjufca ka kërkuar që të arrihet kompromis mes mazhorancës dhe opozitës lidhur me formimin e Komisionit Hetimor për krizën energjetike.

Konjufca u shpreh se pa kompromis nuk mund të arrihet zgjidhja e çështjes së komisionit hetimor parlamentar.“Me këto qëndrime që i dëgjova, i konsideroj të pafrytshme ndërprerjen e seancës. Unë do t’i dëgjoj në reprizë qëndrimet e juaja në zyrën e kryetarit të kuvendit, por kjo pak bën dallim sa i përket zhbllokimit të pozicioneve. Me këto qëndrime kështu, mazhoranca është bllokuar në qëndrimin e vet që patjetër duhet ta riformulojë çështjen, kurse grupet opozitare nuk duhet patjetër të riformulojnë çështjen në kuptimin procedural të fjalës”, tha Konjufca.

“Duhet të arrihet në kompromis, përndryshe nuk mund të vazhdohet kështu”, vijoi ai.Megjithatë, Konjufca insistoi që seanca të vazhdojë me pikat e tjera të rendit të ditës në mënyrë që të zhbllokohet puna e kuvendit.“Krejt çka mund të bëjmë është të vazhdojmë me deklarimet jashtë vendit të ditës dhe ta trajtojmë çështjen e gjyqtarëve të Gjykatës Kushtetuese, e cila konsideroj se është çështje shumë e rëndësishme për Republikën e Kosovës”, u shpreh Konjufca.