Obinna Agomo, emër i ri në Dritën e Gjilanit

Gjilan – Obinna Agomo, i gjatë 193 centimetra, lojtar me prejardhje nigeriane e me shtetësi amerikane, është emër i ri në Klubin e Basketbollit Drita nga Gjilani.

Ky lojtar 25- vjeçar, që luan në pozitën e fundorit, llogaritet përforcim i madh për ekipin e Dritës, ngase skuadra gjilanase do të ketë punë tejet të vështirë për të siguruar mbijetesën në elitën e basketbollit kosovar.

KB Drita, që ishte bërë anëtare e Superligës vetëm pasi ishte zgjeruar liga, në fillim pati paraqitje jo të mira, duke pësuar disa herë radhazi e më pas, me angazhimin e tre lojtarëve amerikanë ia doli të shënojë fitoret e para dhe në fund të stinorit u radhit në pozitën e parafundit, duke lënë pas vetëm Kosovën nga Vushtrria.

Tre lojtarët amerikanë Edward Denelson, Dawin Chambers dhe Greg Blackmon ishin larguar vetëm pasi kishte përfunduar stinori vjeshtor. Drita është vënë në kërkim të lojtarëve të rinj të huaj dhe tashti ka siguruar vetëm njërin, duke lënë vend edhe për dy lojtarë të tjerë.

I sapoardhuri Obinna Agomo, tashti ka kryer stërvitjen e parë dhe sipas drejtuesve të klubit gjilanas bëhet fjalë për një lojtar cilësor./rajonipress/