Nxënësit në Tupallë marrin dhurata

Tupallë – Punëtori i siguron dhuratat e Vitit të Ri për të gjithë nxënësit e shkollës së Tupallës.

…unë edhe ashtu nuk kam shumë, por dashta që sado pak t i gëzoj këta pak fëmijë-nxënës që na kanë mbetur në shkollën tonë, pasi që këtë nuk e bëri dikush tjetër…

Në shkollën fillore Zenel Hajdini në Tupallë, kësaj të premteje, disi mbaroi gjysmëvjetori i parë i vitit shkollor 2012-2013, në një ditë e cila më tepër i ngjante ditës së pranverës apo vjeshtës së hershme, me re të rralla e kohë të nxehtë, se sa ditës së dimrit në dhjetor.

Këtij përfundimi më së tepërmi i gëzoheshin ata pakë nxënës e nxënëse të kësaj shkolle, të cilët me siguri se nuk i kuptojnë as nuk kanë nevojë të lodhen me problemet e mëdha që e përcollën punën edukativo arsimore në këtë periudhë, por padyshim se pasojat i bartën edhe këta në supet e brishta të tyre.

Një gjest human dhe i mirësisë së njeriut i cili në këtë shkollë i ka të ardhurat më të vogla, në ditën e fundit të punës, e për t ua shtuar kënaqësinë, nga mjetet e veta ( përafërsisht gadi dy rroga mujore të tij) i dha dhe i bleu dhuratat për të gjithë nxënësit sa ka kjo shkollë dhe ua ndau të gjithëve për vitin e ri.

Është ky, z. Sokol Halimi, i cili në shkollën e Tupallës punon në punët e punëtorit ndihmës. Kur e pyeta se çka e shtyri që të ndajë nga kafshata e tij dhe e shtatë fëmijëve të tij-ia ruajtë Allahu, nuk dashti të flas shumë, por ceku…unë edhe ashtu nuk kam shumë, por dashta që sado pak t i gëzoj këta pak fëmijë që na kanë mbetur në shkollën tonë, pasi që këtë nuk e bëri dikush tjetër…, duke shtuar se kur ate e kishin ndihmuar njerëzit zemërmirë, për te kishte qenë frymëzim për të qëndruar para vështirësive më lehtë. Bile më tha … të lutem baci Rexhë, mos shkruaj gjë për këtë rast sepse unë nuk e bëra këtë për asgjë tjetër vetëm për hatër të nxënësve tanë. Por, duke menduar se një gjest i tillë është para së gjithash human e zemërmirë, i shkrova këto pak fjalë, mendoj meritore.(medvegjanet)