Pavarësisht motit të keq dhe numrit të vogël të interesuarve për të blerë libra, në hyrje të sheshit “Nënë Tereza”, gjithmonë e gjen shitësin ambulant i cili del në orët e hershme të mëngjesit deri në orë të vona mbrëmjes.
Është ky shitësi i librarisë “Buzuku” Besian Zeneli, i cili përveç hapësirës në lokalin e tij, ai del edhe në shesh që të shesë librat e tij. Duket se interesimi i lexuesve më tepër i përket romaneve.
Çmimet e librave që ai ka, janë prej katër deri në dhjetë euro. “Interesimi i lexues nuk është edhe aq i madh, kjo për shkaqe sociale e ndoshta edhe pse nuk e kemi një kulturë të lexuarit ne si popull”, thotë Zeneli.
Fakt tjetër shqetësues mbetet edhe çështja e të rinjve apo studentëve të cilët 90 për qind të literaturës së tyre e kanë të ndarë me skripta.
Sipas shitësve të librave vërehet një interesim shumë i vogël i studentëve që të lexojnë libra të tjerë pos atyre që janë të caktuar nga profesorët e tyre. “Ne kemi edhe libra akademik e universitar por mund të them se vetëm dhjetë për qind e të rinjve i blejnë ato”, ka shtuar Zeneli .(Tribuna).
