Nuk mund të ndëshkohen policët që mbrojtën kufirin!

Ministri i Punëve të Brendshme, Bajram Rexhepi, ka deklaruar të mërkurën se nuk do të ketë ndëshkim për policët që me trupin e tyre dhe në përputhje me ligjin mbrojtën kufijtë e Kosovës nga huliganët serbë, të enjten e kaluar, më 28 qershor.

Kjo deklaratë e ministrit Rexhepi, e bërë për RTK-në, ka ardhur pas kërkesave që disa organizata ndërkombëtare i kanë bërë Inspektoriatit Policor, që të hetojë nëse policët janë sjellë në përputhje me ligjin, apo kanë ushtruar dhunë të tepruar ndaj serbëve që po tentonin të hynin në territorin e Republikës së Kosovës.

Ministri Rexhepi ka thënë se është e drejtë e organizatave ndërkombëtare të kërkojnë hetimin e sjelljes së policisë, mirëpo në rastin konkret, ai ka thënë se polica ka respektuar ligjin dhe Kushtetutën, nuk ka pasur ushtrim të dhunës së tepruar, përkundrazi, sipas tij, në disa raste ka pasur tolerancë të tepruar.

Ditën e ashtuquajtur të “Vidovdanit” – 28 Qershorin, disa organizata ultranacionaliste serbe kanë bërë përpjekje të futen në mënyrë të organizuar, pa autorizim, në territorin e Republikës së Kosovës, por janë penguar nga Policia e Kosovës. Atë ditë janë plagosur nga mjete të forta mbi 30 policë të Kosovës dhe rreth 20 serbë, shtetas të Serbisë.

Ndërsa të mbledhurit në Gazimestan për orë të tëra kanë provokuar me këngë çetnike dhe fotografi të kriminelëve serbë të luftës, përshi edhe atë të ish-presidentit serb, Slobodan Milosevic. Megjithëkëtë, Beogradi zyrtar e ka quajtur provokim reagimin e policisë Së Kosovës në rastet kur situata ka rrezikuar të dalë jashtë kontrollit. /Telegrafi/

Shpërndaje.
© RAJONIPRESS