Nuk i miratohet dorëheqja Ragmi Mustafës

Kryesia e Partisë Demokratike Shqiptare (PDSH) në Preshevë nuk ka pranuar dorëheqjen e kryetarit të partisë së tyre dhe komunës së Preshevës, Ragmi Mustafa nga të dyja postet e larta politike.

Vendimi i kryesisë ka pasuar pas mbledhjes së kryesisë së gjerë të kësaj partie të mbajtur në Preshevë.

“Pas diskutimeve të shumta të anëtarëve të kryesisë, kryesia vendosë si në vijim: kryetari me ofrimin e dorëheqjes së tij si një akt moral dëshmoi ndërgjegje të lartë politike; kryetari i PDSH-së Ragmi Mustafa, me asnjë veprim nuk ka kontribuar në krijimin e situatës për largimin e Pllakës përkujtimore, përkundrazi është angazhuar me tërë qenien për mbrojtjen e saj; kryesia vlerëson se miratimi i dorëheqjes në këto momente do të ishte kundër-produktiv dhe me pasoja për politikën vendore”, ka theksuar PDSH përmes një komunikate, duke shtuar se lideri i tyre me aktivitetin e tij të palodhshëm ka qenë faktorë kryesor unifikues i spektrit politik shqiptarë në Luginë, transmeton INA.

Andaj në komunikatë nënvizohet se kryesia e PDSH-së vendosi që të mos e pranoj dorëheqjen e Ragmi Mustafa nga posti i kryetarit dhe kërkoi nga ai që ta vazhdoj punën në funksionin e kryetarit të Komunës dhe të kryetarit të Partisë Demokratike Shqiptare.