Nuhiu: PDK-së ka kush i del zot

Gjilan- Izmi Zeka ushtron pozitën e tij si kryesues i Kuvendit të Komunës me mandatin e dhënë nga vota e jo për atë që ia ka falur Arben Mehmeti apo subjekti i tij politik thuhet në reagimin e degës së PDK-së.

Dega e PDK-së në Gjilan ka reaguar ndaj deklaratave të Arben Mehmetit shef i LDK-së rreth konfliktit të interesit që mund të ketë Izmi Zeka kryesues i Kuvendit dhe zëvendësministër i Punëve të Brendshme.

Në reagimin e PDK-së të nënshkruar nga Arzije Nuhiu thuhet se shtresëzimi në politikë, është sikurse shtresëzimi në shoqëri, ku nivelet dhe rolet vendosen nga fuqia politike dhe votuese nga besimi që qytetarët na e kanë dhënë të cilin e shndërruam në mandat.

“Prandaj edhe Zeka ushtron pozitën e tij si kryesues i Kuvendit të Komunës me mandatin e dhënë nga vota e jo për atë që ia ka falur Arben Mehmeti apo subjekti i tij politik. Arben Mehmeti është mirë që të merret me rendin në partinë e tij e të mos “lodhet” dhe aq me punët që nuk i takojnë atij, sepse PDK i ka njerëzit që bëjnë rendin politik përbrenda saj” thuhet në reagim.

Së pari, kanë thënë, “fshije oborrin tënd”, e pastaj shikoji të tjerët, edhe z. Mehmeti, duhet me i thënë, shiko rreth vetes, në partinë tënde (LDK) e mos u sill kah PDK-ja, se ka kush i del zot asaj.

Mehmeti le të japë kontributin e vet si anëtarë i Kuvendit Komunal të Gjilanit, për çka edhe është i thirrur e jo të përzihet në punët që s’janë të tijat.

Sa i përket punës së Kuvendit Komunal, edhe Arben Mehmeti e di që Kuvendi Komunal i Gjilanit është shumë funksional dhe se Kryesuesi i Kuvendit të Komunës Izmi Zeka në mënyrë permanente është në funksion të detyrës së tij përfundon reagimi i degës së PDK-së./rajonipress/