Njëri nga themeluesit e LDK-së në Gjilan tregon pse guximi sjell fitore për ndryshim

Gjilan – Historia na mëson se ndryshimet nëpër fazat e ndryshme të jetës kanë ndodhur, falë guximit të atdhetarëve të vërtet, si sot me dr.Vjosa Osmanin e Albin Kurtin, prijës të ndryshimeve në Kosovë. Kosova, për fat të keq të popullit tonë, pati udhëheqës qeveritarë e udhëheqës politik që shumë shpejtë e degraduan këtë shtet duke lënë këtë popull të sfilosur e “me gishtërinjtë në gojë” ka shkruar Nazmi Musa, njëri nga themeluesit e LDK-së në Gjilan, i cili së fundit doli në përkrahje të Vjosa Osmanit dhe Albin Kurtit.

Letra e plotë e profesor Nazmi Musa

Kjo është, veç tjerash, arsyeja e ngritjes dhe shtimit të përkrahjes së Listës Vjosa dhe VV-së, udhëhequr nga Albin Kurti. Akuzat kundër këtyre figurave emblematike të kombit, jo vetëm që janë të papranueshme, por edhe të turpshme. Sot, më shumë se çdo herë, kërkohet bashkimi i popullit në mbështetje të Kandidatëve për deputet në Listën GUXO” dr. Vjosa Osmanit që parim kryesor do të kenë luftën kundër korrupsionit, forcimin e rendit dhe drejtësisë, cilësinë në arsim, shëndetësi e zhvillim ekonomik.

T’i luftosh këto dukuri e që janë krijuar në vazhdimësi që mbase 20 vite nga klasa politike e të korruptuar, është guxim e jo tradhti, siç mundohen të mbrohen këta zhvatës të shtetit. Tradhti kombëtare nuk është ngritja e zërit kundër liderit të partisë e klasës të korruptuar në Kosovë. Përkundrazi, është guxim, kërkesa e popullit, është në të mirën e atdheut, jo tradhti. Tradhti është të ndryshosh identitetin kombëtarë, gjuhën e kulturën tënde, t’i falës armikut tënd shekullor territor të Kosovës, të dialogosh në tavolina të bisedimeve për zhbërjen e shtetit tënd që me gjak u fitua kjo liri e pavarësi.

Liderët politik mendojnë se tradhti na qenka nëse nuk e përkrah liderin, partinë dhe klanit brenda tyre. Ky mentalitet iku, si “vapa me gushtin” . Koha për ndryshim erdhi, prandaj mos hezitoni t’i votoni kandidatët e Listës Vjosa dhe kandidatët më të mirë brenda secilës parti. Të gjithë i njohim, pa dallim se në cilën parti janë ka shkruar Nazmi Musa./rajonipress/