Një SMS “vendos” për pafajësinë e shqiptarit!

E gjithë puna tash është që sms-i tashmë i shlyer që përmbante fjalë dashurie, të kthehet sërish në telefonin e tij.

Një mesazh telefonik mund ta nxjerrë të pafajshëm shqiptarin 30 vjeçar të akuzuar për tentim dhunimi! Në të vërtetë, ai pretendon se punëtorja që po e akuzon, ia kishte dërguar më parë atij një mesazh ku i shpallte atij dashurinë. E gjithë puna tash është që sms-i, tashmë i shlyer, të kthehet sërish në telefonin e tij.

Ekspertët kanë thënë se kjo gjë mund të bëhet. Pas dëgjimit të fjalës së ekspertëve, Gjykata e Qarkut në Cyrih ka pranuar të ndërpresë procesin deri në kthimin “në jetë” të sms-it famoz. Kjo për arsyen se, po doli i vërtetë, do të ndryshojë thelbësisht kahja e gjykimit.

Praktikantja e re në një restorant e kishte paditur kosovarin për ngacmim të vazhdueshëm seksual dhe për një tentim dhunimi, kur ajo në momentin e fundit kishte shpëtuar nga 30 vjeçari.

Sipas saj ai e kishte terrorizuar atë disa javë me radhë me kërkesat dhe ngacmimet e natyrës seksuale.

Në rast se dëshmohen si të vërteta akuzat e praktikantes, kosovari mund të marrë një dënim prej 30 muaj burg, nga i cilli, gjysmën e kohëzgjatjes do ta ketë me kusht.

Por, i padituri e shpjegon krejtësisht ndryshe rastin. Sipas tij, ka qenë vetë praktikantja ajo që i ka shfaqur dashurinë atij. Ndërsa, në momentin kur ai e ka refuzuar, ajo, nga inati ka dashur që në çdo mënyrë ta dëmtojë atë. Për këtë arsye praktikantja edhe ka shpikur rastin e tentim dhunimit.

Por, që rrëfimi i kosovarit të bëhet i besueshëm për trupin gjykues, nevojitet një dëshmi e pavarur. Dhe ajo dëshmi mund të jetë sms-i që ndërkohë është shlyer. Në rast se do të “ringjallet”, natyrisht.