Një muaj paraburgim për zyrtarin e Vitisë Sabri Sherifin

Gjilan – Duke vendosur sipas kërkesës së Prokurorisë Themelore në Gjilan, Gjykata Themelore në Gjilan, Departamenti i Krimeve të Rënda, gjyqtarja e procedurës paraprake Emine Salihu , i ka caktuar paraburgim në kohëzgjatje prej 1 (një) muaj ndaj të pandehurit, Sabri Sherifi nga Komuna e Vitisë, për shkak të veprës penale keqpërdorim i pozitës apo autoritetit zyrtar.

Paraburgimi të pandehurit, Sabri Sherifi nga Komuna e Vitisë, sipas këtij aktvendimi i llogaritet prej datës 07.11.2013, deri më datën 07.12.2013, raporton rajonipress.

I pandehuri, Sabri Sherifi menaxher i zyrës së projekteve në Komunën e Vitisë dhe zyrtar i infrastrukturës dyshohet me bazë se ka kryer veprën penale keqpërdorim i pozitës apo autoritetit zyrtar.

Nga kërkesa e paraqitur dhe nga shkresat e kësaj lënde, gjyqtarja e procedurës paraprake Emine Salihu ka vlerësuar se janë plotësuar të gjitha kushtet ligjore për caktimin e paraburgimit ndaj të pandehurit Sabri Sherifi, pasi në rastin konkret ekziston dyshimi i bazuar se i pandehuri ka kryer veprën penale për të cilën dyshohet, gjë që mund të vërtetohet pjesërisht nga deklarata e të pandehurit, raportet e oficerëve policor, si dhe shkresave tjera të lëndës.

Gjyqtarja e procedurës paraprake konsideron se janë përmbushur kushtet ligjore për caktimin e paraburgimit ndaj të pandehurit, ngase ekziston frika e bazuar se po qe se i njëjti do të mbrohej në liri mund të fshihet, ikë apo t`i qaset arratisë, sidomos kur kemi parasysh dënimin e paraparë për këtë vepër penale, e në këtë mënyrë do t`i shmangej përgjegjësisë penale e njëkohësisht do të pengonte rrjedhën normale të procedurës penale thuhet në vendimin e gjyqtares./rajonipress/