Një kujtim i paharruar me Komandant Shefket Musliun – një simbol i dinjitetit dhe i qëndresës

Nga Nexhmedin Saqipi – Në vitin 2001 pata nderin dhe kënaqësinë e veçantë të organizoj një iftar në Shtëpinë e Kulturës në Tërnoc, kushtuar Komandant Shefket Musliut dhe 150 ushtarëve të tij të UÇPMB-së. Ishte një mbrëmje e mbushur me emocione, respekt dhe krenari për burrat që ishin rreshtuar për liri e dinjitet kombëtar.

Po atë vit, gjatë festës së Bajramit, Komandant Shefketi ishte mysafir në zyrën time. Një takim i veçantë, që la gjurmë në kujtesën time. Ta presësh në zyrën tënde një Komandant si Shefket Musliu, është më shumë se nder – është frymëzim. Ai dallon nga shumë komandantë të tjerë të formacioneve shqiptare të luftës në Kosovë, Maqedoni të Veriut dhe Luginë, të cilët sapo dorëzuan armët dhe uniformat, u hodhën në garë për pushtet dhe poste politike.

Komandant Shefketi, përkundrazi, zgjodhi rrugën e dinjitetit dhe të përulësisë. Qëndrimi i tij është për t’u marrë shembull – një model që duhet ndjekur edhe në viset e tjera etnike shqiptare. Sepse vetëm kështu ruhen dhe nderohen vlerat e luftës çlirimtare, sakrificat e dëshmorëve dhe autoriteti i komandantëve që luftuan jo për përfitime personale, por për kauzën më të madhe: lirinë dhe pavarësinë.

Gjithashtu, shumë e mirëseardhur për Komandant Shefketin, ishte vizita jonë në shtëpinë e tij në Konçul, me një delegacion nga Medvegja në krye me veprimtarin Hasan Xhema, vëllai i Xhim Xhemës në Amerikë, takim ky miqësor, që kaloi në një atmosferë të ngrohtë vëllazërore.

Respekt dhe mirënjohje për Komandantin tonë – Shefket Musliu!