Një enciklopedi historike e bashkëkohore

Gjilan – Gazetarja e njohur Monika Shoshori Stafa publikon librin “Gati për rinisje”, botimet “Naimi”

Gazetarja e njohur Monika Shoshori Stafa publikon librin e saj të tretë nën titullin “Gati për rinisje” nën siglën e shtëpisë botuese “Naimi”. Në këtë vëllim përshihen reportazhe të shkruara gjatë shërbimeve të saj profesionale nëpër vise të ndryshme të Shqipërisë; gjatë udhëtimeve jashtë vendit për të marrë pjesë në shkolla e kurse europiane formimi e riformimi.

“E titullova “Gati për rinisje”, thotë autorja në përcjelljen e librit për lexuesin, sepse ky është rendi në gazetari: gjithnjë duhet të jesh me çantën e udhëtimit gati, gjithnjë të pret diku autovetura e redaksisë, mikrobusi i konferencave, avioni i udhëtimeve më të largëta. “Gati për rinisje”, ashtu si protagonisti i filmit me të njëjtin titull, sepse jeta e një gazetari dhe kërkuesi është aq intensive, sa shpesh duhet të mendosh si ta lehtësosh bagazhin tënd të udhëtimeve – gjërat më të domosdoshme dhe nisu! – e jo e kundërta”.

Ndërsa prof. dr. Hamit Boriçi, në hyrje të librit të saj, vlerëson se “reportazhet e gazetares historiane Monika Stafa paraqiten, në mos si risi, si pasurim i formave të pasqyrimit publicistik në gazetarinë tonë. Ndjehet kështu kritika e tërthortë, me saktë e nëntekstuar, për lënien në harresë të këtij zhanri gazetaresk aq të rralluar në mediet e printuara të Shqipërisë së periudhës së tranzicionit demokratik”.

Autorja sjell informacion të pasur nga fshatra e qytete të Shqipërisë, të Ballkanit dhe të Europës, ku ka shkelur këmba e saj. Kështu lexuesi “e shoqëron” gazetaren në udhëtimet e saj në Dunicë, në Mirditë, në Tiranë, në Pogradec, në Prishtinë, por edhe në Tivar e Cetinë të Malit të Zi, në Pragë e Budapest, në Bruksel e Strasburg etj. Ky libër me reportazhe, përshkrime e mbresa udhëtimi është një enciklopedi historike e bashkëkohore.

Për nga tematika dhe përmbajtja, reportazhet – shënime udhëtimi të Monika Stafës mund t’i shohim e t’i përcaktojmë si: reportazhe me kahe historike, reportazhe me kahe politiko-sociale dhe reportazhe me kahe shkencore. Mjaft prej këtyre shënimeve të udhëtimit priren nga pasqyrimi historik i zhvillimeve dhe problemeve, kjo edhe në saje të kulturës së gjerë e të thellë historike që dëshmon autorja e librit./rajonipress/