Njazi Kuqi largohet nga Atromitos

Njazi Kuqi është ndarë përfundimisht me ekipin Atromitos. Marrëveshja për shkëputjen e kontratës ndërmjet palëve është arritur të enjten.

Sulmuesi kosovar ishte transferuar në ekipin grek vitin e kaluar dhe pritej të vazhdonte edhe për një sezon, por kontrata është shkëputur të enjten, në një mënyrë pozitive.

“Sot e arritëm më në fund marrëveshjen për këtë çështje. Tash do ta kërkoj një sfidë të re. Sezoni i kaluar nuk ishte mjaft i mirë dhe klubi nuk ishte i kënaqur me mua. Kjo është e kuptueshme”, deklaroi 30 vjeçari për uebfaqen finlandeze MTV3.fin.

“Këtu njerëzit janë të njohur për faktin se duan t’i marrin paratë e tua, por jo edhe të japin. Kjo ndoshta tregon edhe situatën ekonomike të vendit”, tha ai.

Tash, sulmuesi vushtrrias synon ta gjejë një ekip të ri. “Tani dua vetëm të luaj dhe ta bëj një hap përpara”, përfundoi Kuqi, i cili ka zhvilluar 12 ndeshje me përfaqësuesen finlandeze dhe ka realizuar 5 gola.