Njazi Kuqi kujton Gjermaninë për të mirë e për të keq

Athinë – Njazi Kuqi do të luajë për të dytin vit rresht në Superligën e Greqisë, por sulmuesi kosovar momentet më të mira dhe më të këqija në karrierë i ka përjetuar në një vend tjetër, në Gjermani.

Reprezentuesi 29-vjeçar i Finlandës, në Gjermani ka luajtur në kategorinë e dytë, në skuadrat Carl Zeiss Jena e Koblenz. Te Jena ka përjetuar momentet më të këqija, ndërsa te Koblenzi ato më të mira. Këtë Kuqi e ka bërë të ditur në një intervistë për sajtin e njohur gjerman “transfermarkt.de”.

Për Jenan, Kuqi ka luajtur në pjesën e parë të vitit 2007, ndërsa për Koblenzin nga viti 2008 deri në vitin 2010. Ai edicionin e kaluar shënoi 10 gola për Panioniosin në Superligën e Greqisë, ndërsa edicionin 20122013 do të luajë për ekipin tjetër grek, Atromitos .(koha).