Nisma – AKR: Do të jemi në Kuvend, Kushtetueses iu drejtuam për çështje parimore

Nisma Socialdemokrate bashkë me partnerët e koalicionit AKR – PD i është drejtuar Gjykatës Kushtetuese, duke kontestuar vendimin e Supremes për votat e diasporës. Po nga ky koalicion bëjnë të ditur për “Zërin” se Nisma – AKR vazhdon të jetë mbi pragun dhe do të jetë pjesë e Kuvendit, mirëpo Kushtetueses iu drejtuan për çështje parimore, shkruan sot gazeta “Zëri”.

Procesi i rinumërimit të votave të zgjedhjeve të parakohshme parlamentare të 6 tetorit po shkon drejt fundit. Në Qendrën për Numërim dhe Rezultate (QNR) tashmë janë numëruar mbi 80 për qind të votave, mirëpo Nisma Socialdemokrate bashkë me partnerët e koalicionit AKR – PD, ndonëse për gazetën “Zëri” kanë thënë se janë mbi pragun me vota, kanë dërguar kërkesë në Gjykatën Kushtetuese që votat e ardhura me vonesë nga diaspora të mos përfshihen në rezultatin përfundimtar.

Zyrtarë nga ky koalicion i kanë thënë gazetës “Zëri” se kanë kaluar pragun dhe s’ka rrezik të mbeten jashtë Kuvendit, mirëpo ankesa në Kushtetuese u bë për çështje parimore. Ata thonë se deri në fund do t’i kundërshtojnë votat e diasporës, pasi nuk i plotësojnë konditat ligjore. Ndërkohë nga KQZ-ja është bërë e ditur se ky institucion është i gatshëm t’i certifikojë rezultatet menjëherë pas përfundimit të rinumërimit nëse nuk paraqitet më asnjë ankesë.