Nga një muaj paraburgim Xhaferit,Fejzullahut e Osmanit

Gjilan – Gjykatësi Abdullah Ahmeti u ka caktuar nga një muaj paraburgim Ardijan Xhaferit,Besnik Fejzullahut dhe Burim Osmanit që të tre të dyshuar për veprën penale “vrasje e rëndë në tentativë”.

Gjykatësi i procedurës paraprake Abdullah Ahmeti me propozimin e Prokurorisë së Qarkut në Gjilan u ka caktuar masën e paraburgimit prej një muaji të dyshuarve Ardijan Xhaferi,Besnik Fejzullahu e Burim Osmani.

Sipas aktvendimit për zhvillimin e hetimeve Ardijan Xhaferi e Besnik Fejzuallahu dyshohen se më 15 qershor 2012 në lagjen Dardania me paramendim dhe me dashje kanë tentuar që të privojnë nga jeta Burim Osmanin.

Sipas hetimeve Ardijani ka qenë i pajisur me revole të panjohur i cili është vërsulur në drejtim të Burim Osmanit, duke shtënë disa herë në drejtim të tij,duke vënë në rrezik edhe jetën e personave të tjerë prezent.

Ardijan Xhaferi me profesion këngëtar i grupit muzikor “E7” dyshohet për veprën penale “vrasje e rëndë në tentativë” dhe “mbajtja në pronësi,në kontroll,në posedim ose shfrytëzim të paautorizuar të armëve”.Kurse Besnik Fejzullahu dyshohet për veprën penale “vrasje e rëndë në tentativë”

I pandehuri Burim Osmani me nofkën “Duda”, me profesion këngëtar i grupit muzikor “Double G”, pas konfliktit fizik që ka pasur me të pandehurin Ardijan Xhaferi e Besnik Fejzullahu ka tentuar që t`i privojë nga jeta të njëjtit. Osmani me revolen e tij “M-57” ka shtënë disa herë në drejtim të Xhaferit e Fejzullahut,duke rrezikuar edhe jetën e personave të tjerë. Një nga predhat e Osmanit e ka goditur në gjoks shkarazi Besnik Fejzullahun.

Duda (Osmani) dyshohet për veprën penale “vrasje e rëndë në tentativë”,”mbajtja në pronësi,në kontroll, në posedim ose shfrytëzim të paautorizuar të armëve” dhe për veprën penale tjetër ”blerja,posedimi,shpërndarja dhe sitja e paautorizuar e narkotikëve të rrezikshëm dhe substancave psikotropike”./rajonipress/

Shpërndaje.
© RAJONIPRESS