Nga një muaj paraburgim për tre të dyshuarit që bartnin armatim të rëndë

Gjilan- Gjykatësi i procedurës paraprake Abdullah Ahmeti u ka caktuar nga një muaj paraburgim tre të dyshuarve nga qyteti i Ferizajit, Arben Latifit, Besnik Idrizit dhe Visar Çukovcit.

Tre të dyshuarve nga Ferizaji që u kapën me armatim të rëndë në aksionin e së martës tashmë u është caktuar masa e paraburgimit prej një muaji.

Gjykatësi i Procedurës paraprake në Gjykatën e Qarkut në Gjilan, Abdullah Ahmeti tha për rajonipress se masa prej një muaji u është caktuar Arben Latifit, Besnik Idrizit dhe Visar Çukovcit që të tre nga Komuna e Ferizajit.

Tre të dyshuarit që janë nga qyteti i Ferizajit akuzohen për tri vepra penale : “armëmbajtje pa leje”, “rastet e rëndë të grabitjes” dhe”transportimi dhe furnizimi i armëve”.

Edhe Agron Uka zëvendëskryeprokuror i Qarkut tha për rajonipress se tek ky grup është kapur armatim i rëndë duke përfshirë dy kallashnikov, dy granata, dy snajper, dorëza, maska, dy revole etj. Sipas Ukës i tërë ky armatim është bartur nga një veturë me tabela të Pejës.

Hetimet e para kanë treguar se vetëm njëri prej të dyshuarve e ka pranuar veprën tha Uka./rajonipress/