Nga Gjilani në Milano

Xherdan Shaqiri kaloi pengesa të njëpasnjëshme për t’u bërë yll i futbollit. E nisi nga Gjilani për të përfunduar nga Baseli e Bayerni në Milano. Njihuni me historinë interesante të futbollistit kosovar, që e përfaqëson Zvicrën

E zbulojmë Xherdan Shaqirin, yllin e ri të Interit të së tashmes dhe të së ardhmes.

“Il Guerin Sportivo” e këtij muaji ia dedikon një tekst të veçantë historisë së talentit kosovar, i cili iu bashkua klubit “Nerazzurri” nga Bayern Munichu gjatë janarit.

Përfaqësuesi zviceran ka kaluar pengesa të mëdha për të arritur deri këtu. Ai, i lindur në Gjilan, në Kosovën me shumicë etnike shqiptare, por e sunduar në atë kohë nga ish-Jugosllavia. Dhe, si shumë të tjera, Xherdani i vogël kishte emigruar jashtë vendit me familjen e tij, në kërkim të një të ardhme më të mirë diku tjetër, njëjtë siç kanë bërë edhe familjet e Januzajt, Xhakës, Behramit, Canës etj.

Familja e tij e kishte zgjedhur Zvicrën, vendin, ngjyrat e së cilit i mbron Xherdani, i cili kishte kontribuuar në shkuarjen në Botërorin e Brazilit, duke realizuar dy gola pikërisht ndaj Shqipërisë. Ai luan me këpucë sportive, me ngjyrat dhe flamujt e të tria vendeve (e ka nënshkruar kërkesën në FIFA për njohjen e Përfaqësueses së Kosovës), por këto nuk i mjaftuan që t’i evitonte vërshëllimat dhe lansimin e objekteve, nga ata që e konsideronin një “tradhtar”.

Shaqiri ishte rritur në ekipin e Baselit, i njohur si më i miri në futbollin zviceran, të cilit ishte bashkuar në moshën 10-vjeçare, pasi kishte realizuar gola të shumtë me fanellën e Augst, një ekip në lagjen ku ai po jetonte. Trajneri që besoi më së shumti dhe që e solli në ekipin e parë të Baselit, ishte Thorsten Fink, i cili në vitin 2009 e ftoi në ekipin e parë.

Më 2 janar të atij viti, e kishte nënshkruar kontratën e parë profesioniste, pas bisedimeve të shumta, ndërsa më 12 korrik kishte debutuar me ekipin e parë kundër St. Gallenit. Me Baselin i kishte fituar tre tituj kampioni radhazi, kishte debutuar në Ligën e Kampionëve, duke u bërë idhull, ndërsa në vitin 2011 ishte transferuar në Bayern Munich për 11.6 milionë euro. Viti i tij i parë ishte i mirë, por më pas arriti Pep Guardiola dhe problemet nisën. Ai kishte konkurrentë të fortë si Robben, Ribéry e Gotze, përpos Thomas Muller. Për këtë, ai vendosi të largohej. “E kisha humbur gëzimin”, ka thënë Shaqiri, i cili iu bashkua Interit këtë janar. Në qershor do të bëhet pjesë e Interit deri në vitin 2019, me një rrogë prej 2.7 milionë euro. Një aventurë e re. /Zëri/