Nexhmija kushtëzon kthimin e “Dimrit…” me nderimin e Enverit

Zbardhet letra që Nexhmije Hoxha i ka dërguar Kasem Biçokut, ish-drejtorit të Muzeut Historik Kombëtar në vitin 2009. Në të duket qartë refuzimi i kërkesës që ky i fundit i pat bërë asaj për t’i dhënë për ekspozim dorëshkrimin origjinal të romanit “Dimri i vetmisë së madhe”.

Ndërsa kundërshton ta japë veprën e shkrimtarin për ekspozim ajo gjen rastin të kritikojë drejtorinë e muzeut, për trajtimin që i bëhet figurës së të shoqit, objekteve personale të tij. Hoxha vë si parakusht për dhënien e dorëshkrimit tek muzeu, respektimin e të shoqit si një personalitet me rëndësi në historinë e kombit shqiptar, transmeton BW.

Vetëm kështu mund të kuptohen fjalitë e mëposhtme: “Ndoshta, në një rast a kohë tjetër, kur Muzeu Historik Kombëtar, për vetë emrin shumë të nderuar që mban, do të organizojë ekspozita edhe për personalitete politike që kanë shkrirë një jetë për Lirinë e Pavarësinë e Shqipërisë dhe kanë një vend të merituar në historinë e kombit shqiptar, siç është Enver Hoxha, familja ime, bashkë me dokumentet autentike që disponon për ‘Jetën dhe veprën e Enver Hoxhës’, do t’i huazonte Muzeut edhe dorëshkrimin e romanit më të vlerësuar të Ismail Kadaresë, po ndoshta edhe dorëshkrime të tjera origjinale të tij”.