Nevzati: Kryetar harrojeni kohën e spiunëve…

Gjilan – Bujar Nevzati këshilltar komunal nga PDK-ja ka replikuar gjatë seancës së Kuvendit Komunal sa i përket deklaratës së Lutfi Hazirit rreth spiunëve dhe spiunimit. Unë si këshilltar i Kuvendit Komunal, distancohem nga fjala e juaj, për arsye se koha e spiunëve ka kaluar në vitin 99 dhe për arsye se s`kanë dhe s`keni ku me spiunu më, dhe s`kisha dashtë me dëgjuar që një Kryetar Komune merret akoma me këso tema.

Nevzati ka thënë se arsyeja pse merresh me këso biseda është për ta larguar vëmendjen e këshilltarëve dhe qytetarëve nga problemet reale të tyre, se ju jeni mjeshtër i këtyre politikave.

“Në vend që të na njoftoni neve me projektet konkrete që është tu i realizuar Komuna dhe me cilësinë e dobët që janë duke e bërë punekryesit, me hapjen e vendeve të lira të punës, me problemet e rënda sociale të qytetarëve, me hallet dhe problemet shëndetësore, me problemet në arsimin Gjilanas e sidomos në ngritjen e cilësisë mësimore e ndërtimin e hapësirave shkollore, për arsye se akoma në qytetin tonë, nxënësit edhe pas 17 viteve pas lufte punojnë në tri ndërrime. Pastaj në ngritjen e disiplinës në të gjithë administratën komunale, në ndaljen e ndërtimeve pa leje e shumë problemeve tjera që e kanë kapluar Komunën tonë, e ju merreni me spiuna e me spiunazhe” ka shtuar Nevzati.

Po ashtu sa i përket propozimit, për rikthimin e dy drejtorive, asaj të Inspeksionit dhe të Kulturës, rinis e sportit, unë si këshilltar komunal, mendoi se duhet me ju përkrahur. Për arsye se ju në mënyrë indirekte e pranuat, dështimin që ju ka ndodhur me shuarjen e këtyre Drejtorive ka thënë Nevzati.

“Sepse ne si opozitë, ju kemi tërheq vërejtje edhe atëherë kur ju patët vendos që t`i shuani edhe sot e pranuat vetë se keni dështuar. Edhe sot ne si PDK do t`ju mbështesim në rikthimin e rendit dhe ligjit në Komunë, për aq sa mundeni me e rikthye edhe pse s`ju ka mbetur kohë për të bë diç më, mirëpo ne nuk do të jemi pengesë dhe do t`ju mbështesim” ka thënë Nevzati./rajonipress/