Nepotizmi, ose “rehatimi i familjarëve” i Grabovcit duhet të hetohet

Prishtinë – Njeriu më i komentuar javët e fundit, pas plasjes së skandalit të përgjimeve, Adem Grabovci, shef i grupit parlamentar të PDK-së, e mbron qëndrimin se duhet rehatuar familjarët, pavarësisht faktit se një veprim i tillë konsiderohet nepotizëm dhe është i kundërligjshëm. Ndërkohë Shoqëria Civile vlerëson se kjo duhet të shërbejë për nisjen e menjëhershme të hetimeve, raporton KTV.

Adem Grabovci që në telefonatat e përgjuara dëgjohet të thotë se e “sill e pështille”, nuk ka mundur ta pështillte edhe aq mirë kur është pyetur nga gazetarët për rehatinë e dajës së gruas së tij.

E kjo që shefi i grupit parlamentar të PDK-së e quan respekt për familjen, konsiderohet nepotizëm dhe është vepër e dënueshme me ligj.

Megjithatë ky fakt nuk i ka bërë përshtypje Grabovcit, pasi ka deklaruar se jo vetëm ai, por e terë Partia Demokratike ka qasje të njëjtë, siç e ka quajtur ai, të respektit familjar.

Ky deklarim i hapur i një deputeti të kuvendit, sipas Shoqërisë Civile, prokurorisë do të duhej që t’i shërbente për nisje të menjëhershme të hetimeve.

Këtë e kanë thënë në një mënyrë apo në një tjetër për KTV-në Betim Musliu nga Instituti i Kosovës për Drejtësi dhe Petrit Zogaj nga Lëvizja “FOL”.

Por, cili ishte favori që Grabovci i kërkonte kryeministrit Thaçi kur e pyeste atë se a ia kishte rehatuar dajën ?

Në bisedat e përgjuara mes dy drejtuesve të PDK-së nuk saktësohet se për çka dhe çfarë pozite Grabovci intervenonte te Kryeministri për dajën e gruas së tij.

Por, “Kohavisioni” merr vesh se Grabovci kishte kërkuar nga Thaçi të ushtronte ndikim që dajën e gruas, Curr Gjocajn, ta sistemonte në postin e sekretarit të përhershëm në Ministrinë e Shëndetësisë, pasi Ilir Tolaj tashmë ishte akuzuar për korrupsion.

Gjocaj ishte larguar nga pozita e drejtorit në Ministrinë e Shëndetësisë në nëntor të 2011-ës, për t’u rikthyer me vendim të Këshillit të Pavarur Mbikëqyrës për Shërbimin Civil të Kosovës.

Megjithatë, rasti i dajës nuk është i vetmi kur Grabovci kërkon favore për të afërmit e tij.

Ai në bisedën tjetër më ministren e Integrimeve, Vlora Çitaku, kërkonte që një i afërm i tij të kryente praktikë në këtë ministri.

Shpërndaje.
© RAJONIPRESS