Në zgjedhjet e ardhshme me lista të hapura

Prishtinë – Liderët e Partive parlamentare kanë arritur marrëveshje që në zgjedhjet e ardhshme të garojnë me lista të hapura, që pragu zgjedhor për partitë të jetë pesë për qind, për kandidatët e pavarur tre për qind, ndërsa për koalicionet shtatë për qind. Të njëjtit janë pajtuar që edhe përfaqësimi i femrave në lista të mbete siç ka qenë – 30 për qind.

Për vendet e rezervuara dhe numrin e kandidatëve që mund të votohen brenda një liste, ka mbetur të diskutohet më vonë. Përfaqësuesi i lëvizjes Vetëvendosje, Albin Kurti, ka thënë se lënia për më vonë e çështjes së vendeve të rezervuara në Kuvend është e ndikuar nga pritjet e takimit të 2 prillit, shkruan Kosovapress.

Takimi i sot është thirrur nga Slobodan Petrovic, lider i Partisë Liberale Serbe.

Petrovic, lider i PLS-së, ka thënë se sa i përket ulëseve të rezervuara ka mbetur të diskutohet më vonë. Por, ka pohuar se vendet e rezervuara i kërkojnë edhe për dy mandate.

Ndërkohë, Kurti ka shpjeguar se pika më e ndjeshme ka të bëj me vendet e rezervuara, duke thënë se as opozita nuk ka pasur ndonjë qëndrim për këtë dhe se të gjithë po presin rezultatin e dialogut më 2 prill, që ata ta ndërtojnë qëndrimin për këtë temë.

“Këta qeveritar po presin që çka do të ndodh më 2 prill, në atë marrëveshjen me Dacicin, në mënyrë që të kthehen në Kosovë e të flasin për ulëset e rezervuara. Vetëvendosje është e vetmja që ka qëndrim të qartë: jo ulëseve të rezervuara, jo ulëseve të garantuara… E, ndërsa qeveritarët, dhe besa jo vetëm ata, jo që janë për ulëse të garantuara, por po e presin rezultatin e dialogut”, ka thënë ai.

Kurti ka pohuar se ka mospajtim të thellë mes pozitës dhe opozitës sa i përket përbërjes së KQZ-së. Vetëvendosje ka kërkuar që të jetë e përbërë 50 për qind me 50 përqind, por këtë thotë të mos e ketë pranuar kreu i PDK-së, Hashim Thaçi. /Telegrafi/

Liderët e të gjitha partive në Kosovë janë mbledhur në një vend. Ata tani janë brenda në një takim dhe diskutojnë lidhur me reformën zgjedhore.

Takimi është organizuar nga Ministri i Pushtetit Lokal, Slobodan Petrovic, ndërkohë që me gjysmë ore vonës erdhi Hashim Thaçi i PDK-së, dhe krejt pas tij Behxhet Pacolli (AKR). Isa Mustafa (LDK), Ramush Haradinaj (AAK) dhe Albin Kurti (VV) kishin ardhur me kohë.

Kryetari i LDK-së, Mustafa, gjatë ditës u ka thënë mediave se zgjedhjet lokale duhet të mbahen në vjeshtën e këtij viti, konkretisht në fund të shtatorit apo në fillim të tetorit, të cilën e ka konsideruar si kohë optimale atmosferike për realizimin e këtij procesi.

Ai sërish ka kërkuar që ato të mbahen në kohën kur është dita sa më e gjatë, në mënyrë që të evidentohen manipulimet e mundshme gjatë këtij procesi.

Mustafa ka shtuar se ndër parakushtet themelore për mbajtjen e zgjedhjeve lokale dhe nacionale, janë pastrimi i listave zgjedhore dhe sigurimi i vëzhguesve ndërkombëtarë. /Telegrafi/