Në Karaqevë sërish nuk hapet shkolla, protestojnë banorët
Kamenicë – Në Karaqevë sërish shkolla është nën dry dhe e mbyllur për nxënësit. Selver Lenjani akuzon rëndë Qëndron Kastratin. As Serbia e Millosheviqi nuk kanë vepruar në këtë mënyrë.
Nxënësit edhe sot kanë shkuar para dyerve të shkollës, e cila vazhdon të jetë e mbyllur. Banorët lokal ndihen të revoltuar që askush nga organet qendrore nuk është marrë me problemin e nxënësve të Karaqevës.
Selver Lenjani edhe sot ka reaguar ashpër në adresë të Qëndron Kastratit. “Qëndroni duhet me ditën që as Serbia e as Millosheviqi nuk kanë vepruar bash në këtë mënyrë. Pse i gjithë ky injorim dhe i gjithë ky mllef ndaj brezit kufitar. Ju mundeni vetëm përkohësisht ta pengoni procesin mësimor, por jo përgjithmonë” shprehet Lenjani.
Lenjani ndërkohë u ka dërguar letër të gjitha instancave qendrore, ministres së Arsimit, deputetëve dhe të tjerëve, por askush nuk është marrë me këtë çështje./rajonipress/