Ndodhë edhe kjo në Gjilan: I angazhuari me kontratë për punë dhe detyra specifike raporton për punën e stafit të rregullt

Gjilan – Komuna e Gjilanit, në faqen e saj zyrtare në rrjetin social Facebook, ka publikuar Raportin e Punës për vitin 2025 të Drejtorisë për Shërbime Publike, Infrastrukturë dhe Banim, ku pasqyrohen aktivitetet, projektet dhe objektivat e arritura gjatë vitit ka shkruar në reagimin e tij Bashkim Isufi njohës i mirë i zhvillimeve komunale.

Postimi i plotë:

Nga përmbajtja e raportit përkatës, shohim se raporti i drejtorisë është punuar nga një i punësuar me kontratë për punë dhe detyra specifike, i cili nuk ka statusin e zyrtarit publik, me çka ka tejkaluar kompetencat e tij të cilat i takojnë.

Një person i angazhuar për punë dhe detyra specifike ka të drejtë të raportojë vetëm për detyrat dhe projektet ku është i përfshirë. Raportimi mbi punën e stafit të rregullt duhet të bëhet nga udhëheqësit e sektorëve tek drejtori dhe jo nga një person i angazhuar me kontratë për punë dhe detyra specifike.

Vetëm udhëheqësit e sektorëve mund të raportojnë për staf të rregullt, ndërsa i punësuari me kontratë për punë dhe detyra specifike mund të japë vetëm informacion mbështetës, por nuk ka kompetencë ligjore që të vlerësojë ose raportojë performancën e stafit të rregullt të drejtorisë. Ai nuk është pjesë e strukturës së menaxhimit të përgjithshëm, nuk ka kompetenca ligjore ose hierarkike mbi zyrtarët e rregullt, nuk ka status të zyrtarit publik dhe nuk bën pjesë në zinxhirin hierarkik të raportimit Udhëheqësit Sektorit – Drejtor.

Raportimi i tij nuk mund të zëvendësojë përgjegjësinë e udhëheqësve të sektorëve. Ky veprim mund të cilësohet si shkelje administrative, sepse mund të krijojë paqartësi mbi përgjegjësitë dhe vlerësimin zyrtar të stafit.

Në të ardhmen, është e rëndësishme që raportimi i tij të kufizohet vetëm tek aktivitetet dhe projektet ku ai është aktiv, për të respektuar ligjin dhe hierarkinë administrative.