Ndihmohen dyzet gra kryefamiljare të komunës së Kamenicës

Gjilan – Zyrtarja për Barazi Gjinore, Teuta Kastrati ka thënë se do të ndihmohen dyzet nëna kryefamiljare, me nga një pako ushqimore dhe higjienike, vlera e të cilave do të jetë 50 euro, ndërsa i tërë projekti do të kushtojë 2000 euro.

Në Shtëpinë e Kulturës “ Isa Kastrati “ në Kamenicë, është mbajtur një debat publik për nderë të Ditës Ndërkombëtare të Gruas- 8 Marsit, i organizuar dhe iniciuar nga ana e zyrtares për barazi gjinore dhe OSBE-së, ku është prezantuar aktiviteti i 8 Marsit, draft rregullorja komunale për barazi gjinore, si dhe puna e grupit të grave të komunës së Kamenicës.

Zyrtarja për barazi gjinore, Teuta Kastrati ka thënë se zyra për barazi gjinore dhe grupi i grave të Kamenicës, për nderë të 8 Marsit- Ditës Ndërkombëtare të Gruas, do t’i dalin në ndihmë me nga një pako ushqimore dhe higjienike, nënave vetëmbajtëse, ku në mesin e tyre ka edhe nëna të dëshmorëve.“ Do të ndihmohen dyzet nëna kryefamiljare, me nga një pako ushqimore dhe higjienike, vlera e të cilave do të jetë 50 euro, ndërsa i tërë projekti do të kushtojë 2 000 euro” ka thënë Kastrati, duke shtuar se kjo nismë është përkrahur edhe nga kryetari i komunës së Kamenicës, drejtoritë dhe grupi i grave.

“ Jemi të vetëdijshëm që kjo shumë nuk është e mjaftuar për ti mbuluar të gjitha kërkesat dhe nevojat për kontributin e një gruaje vetëmbajtëse, mirëpo besojmë se kjo është një shumë simbolike, e cila sadopak do ti ndihmojë këtyre familjeve në këto ditë të vështira “ u shpreh Kastrati.

Ndryshe, ajo tha se propozim- rregullorja për barazi gjinore është përgatitur nga zyrtarja për barazi gjinore në bashkëpunim me grupin e grave, kjo rregullore është marrë nga ligji i përgjithshëm i vitit 2004 i barazisë gjinore, mirëpo vetëm disa pika janë prekë që neve na shkojnë në favor si përfaqësuese të grave të Kamenicës, kjo rregullore nuk është ende përfundimtare

Ndërsa, Kryetarja e Grupit të Grave, Besa Hoxha- Krasniqi, ka thënë se grupi i grave të komunës së Kamenicës, ka punuar shumë, falë bashkëpunimit njëra me tjetrën, e mbi të gjitha për përkrahjen e vazhdueshme që marrim nga kryetari i komunës së Kamenicës.

“ Grupi i grave të Kamenicës është marrë si shembull për komunat tjera, e sidomos ndihmën e fundit që u bë për gratë që janë të prekura nga kanceri. Ky grup, ka mbajtur edhe ligjërata të ndryshme për vetëdijesimin e popullatës nëpër vendet rurale se si të hetohen shenjat e para për këtë sëmundje” ka thënë Krasniqi.

Ajo tha se modeli i mirë i Kamenicës, ka reflektuar edhe tek shoqatat e diasporës shqiptare ku edhe ne do të përfaqësojmë gruan e Kamenicës në takimet e Gjermanisë ku janë të gjitha shoqatat shqiptare të diasporës./rajonipress/