Ndeshen Gjilani-Peja nga ekipi i femrave të verbra

Gjilan – Komiteti Paraolimpik i Kosovës (KPK) i mbështetur nga Komuna e Gjilanit respektivisht Drejtoria për Kulturë, Rini dhe Sport sot ka organizuar një garë sportive mes ekipeve të ndryshme të femrave me nevoja të veçanta – të verbër. Gara e sotme është zhvilluar mes ekipit të Pejës dhe atij të Gjilanit.

Njomza Emini kryetare e KPK-së tha se ky është njëri nga aktivitetet e kësaj natyre që bëhet sot në Komunën e Gjilanit, në lojën e “golballit” dhe shahut. Emini tha se ky është një aktivitet më tepër për edukimin e vajzave dhe grave të verbra, por normalisht ka edhe karakter garues.

Ajo ka falënderuar mbështetjen që i ka dhënë Komuna e Gjilanit dhe Kryetari Mustafa, për realizim të këtij aktiviteti jashtëzakonisht të rëndësishëm për femrën e verbër. Femra edhe pse e verbër mund të jetë një person me ndikim në shoqëri në të gjitha fushat edhe sportive pse jo, por duhet t’i jepet mundësia që ato ta dëshmojnë një gjë të tillë.

Ndërsa Veton Nevzadi, drejtori për Kulturë, Rini dhe Sport, aktivitetin e sotëm e cilësoi shumë të rëndësishëm për të verbrit, por edhe për shoqërinë në përgjithësi. Ai tha se energjia që kanë këta persona është një mësim se si edhe të tjerët mund të kontribuojnë për zhvillimin e këtij sporti. Komuna e Gjilanit i ka ndihmuar por vazhdimisht, do të ndihmoj në këto kategori të shoqërisë sonë sepse përkrahja e këtij sektori dëshmon zhvillimin e shoqërisë, e zhvillimi i shoqërisë sonë është qëllim i të gjithë neve.

Loja luhet në dy pjesë nga 7 minuta dhe me nja 3 lojtar aktiv prej secilës ekip./rajonipress/