Ndërroi jetë Rasim Rexhepi, profesor i historisë

Gjilan – Thonë, njerëzit e mirë, nuk vdesin. Ata “ikin” në botën e amshuar, por veprat e tyre mbeten pas. Pra, veprat e tyre mbeten të përjetshme. Andaj, secili njeri, që ka lënë ndonjë vepër, ai mbetet i pavdekshëm. E pavdekshme mbeti edhe vepra e Rasim Rexhepit, profesor i historisë, i cili, sa ishte në jetë, historinë e popullit shqiptar u mundua ta ligjërojë ashtu si e dinte dhe si e kishte mësuar. Ishte tamam profesor me dije, i cili, historinë e shqiptarëve e rrëfente me ëndje dhe ashtu si ishte e ajo. Më tepër fliste për historinë e Malësisë së Karadakut, i cili, trimin e madh të kësaj ane, Idriz Seferin, e pati të vendlindjes së tij, Seferaj.

Ky e adhuronte jo vetëm Idriz Seferin, por edhe trimat të tjerë, të cilët i njihte dhe me ëndje fliste e rrëfente pa u ndalë për ta. Dhe, sa herë jemi takuar me Rasim Rexhepin, tash i ndjerë, sikur pas kësaj kohe kemi marrë një pjesë të historisë sonë, e cila të rrinte me javë e muaj në kokë ato ngjarje tragjike e të rënda që i ka pësuar popullata e Karadakut. Jo vetëm kaq. Rasim Rexhepi ishte njeri urtak, zemërgjerë, afrues, por edhe pishtar i denjë i arsimit shqip, i cili la gjurmë të forta aty ku punoi e veproi me ditar në dorë. Ishte i tëri njeri. Njeri besnik, trim, por edhe studiues dhe publicist i jetës dokumentare.

Por, ja vdekja. Ai nuk jeton më. Ai iku në botën e amshuar. Rasimi ishte një figurë e dalluar e arsimit në Karadak e mese të tjera ku punoi e jetoi. Ai lindet më 1936 në fshatin Sefer, Malësia e Karadakut jetik të Idriz Seferit. Lindet në fshatin Sefer, vendlindje kjo që kurrë nuk e harroi, por e vizitoi natë e ditë pa u ndalë. Sa herë e mbërthente malli për ato shtëpia, male, ara, luadhe, por edhe për ata lisa e drunj ku është ulur dhe ka pushuar, ai e ka marrë rrugën dhe është gjendur në trollin e stërgjyshërve të tij, në Sefer. Aty e pati lindjen dhe rritën.

Kur gjendej në Sefer, atij i pushonte shpirti e zemra. Jetonte me aromën e maleve e me këngët e bilbilave të Karadakut jetik. Po kështu, sa herë seferasit kanë mbajtur takimet e vendlindjes, Rasim Rexhepi ka qenë udhëheqësi kryesor, i cili jo vetëm që është gjendur në mesin e familjarëve, por gjithnjë u ka folur gjeneratave të të rinjve seferas e mese të tjera se si duhet atdheu e vendlindja e kombi. Ai ka qenë një historian i përkryer. E deshi profesionin e tij prej historiani ku, herë pas here ka botuar shkrime nëpër gazeta e revista tona këtu në Kosovë.

Rasim Rexhepi, tash i ndjerë, për shkak të mungesës së shkollës në fshat, por edhe të gjendjes së skajshme që pati, klasën e parë e vijoi në shkollën e Caravajkës si 12-vjeçar, më 1948, kurse këtë shkollimi e kishte mbaruar në vitin 1951. Duke mos pasur mundësi për të vazhduar shkollimin e mëtutjeshëm, ai është gjendur në Bor për të punuar si punëtor krahu me disa shokë të tjerë. Por, ai qe njeri i etur për dije e dituri. Përkundër punës së rëndë fizike, ai kishte arritur të mbarojë gjimnazin e ultët, i cili në Bor ishte organizuar për punëtorë. Rastësisht ato vite ai kishte lexuar gazetën “Borba”, ku e kishte parë një konkurs se në shkollën ekonomike të Gjilanit se ishte hapur një paralele për vijuesit me korrespondencë. Ai pa u hamendur, e lë punën ku punoi dhe ishte kthyer në Gjilan.
Kështu, akoma pa e mbaruar vitin e dytë, Rasimi e fillon karrirën e tij të punës si mësues në mars të vitit 1963 në Ranatoc të Preshevës. Prej kësaj kohe, ai kurrë nuk është ndalur së punuar me ditar në dorë, si: në fshatin Sefer, Pidiq etj. Nga shkolla Ekonomike kalon në ish-Shkollën Normale. Më 1967 e mbaron shkollën Normale në Prizren. Ate e gjejmë pastaj me ditar në dorë në fshatin Skifteraj të Vitisë, ku punoi me ciklin e lartë, por edhe studionte në Degën e Histori-Gjeografi pranë ShLP të Gjakovës. Këtë shkollë të lartë ai e mbaroi në vitin 1970. Në vitin 1969/72 punoi në fshatin Partesh, Cërnicë e Livoç, ndërsa, prej shtatorit të vitit 1972/1982 puno në ish Shkollën fillore “V. Karaxhiq” tash “Thimi Mitko” në Gjilan.

Gjatë viteve 1982/85 ishte drejtor i Shkollës fillore “Zenel Hajdini” në Bresalc. Në vitin 1979 ka diplomuar në Degën e Historisë në Universitetin e Prishtinës. Pas kësaj kohe, ate e shohim duke punuar në Arhivin Historik të Gjilanit. Këtu pensionohet. Por, ja jeta. Ajo është mashtruese e njeriut. Ai mbrëmë, në moshën 80 vjeçare vdes. Rasim Rexhepi la pas vetes librin “Seferi ndër shekuj (monografi) e botuar në vitin 2005. Ishte bashkëpunëtor i gazetave “Bota sot” dhe “Kosova sot”. La pas vetes një numër të shkrimeve nga fusha e historisë sonë. Varrimi i tij bëhet me iqindi në varrezat e Gjilanit. I qoftë lehtë dheu! /tefik selimi/rajonipress/