Ndërroi jetë Armstrong, njeriu i parë që shkeli në Hënë

Astronauti amerikan, Neil Armstrong, i cili ishte personi i parë që shkeli në hënë, ka ndërruar jetë në moshën 82-vjeçare.
Familja e tij ka njoftuar të shtunën se Armstrong vdiq si pasojë e komplikimeve nga procedurat kardiovaskulare – shkruan Los Angeles Times.

Neil Alden Armstrong lindi më 5 gusht 1930 në Wapakoneta, të Ohios. Në vitin 1945, ai filloi të merrte leksione fluturimi, ndërsa në moshën 16-vjeçare mori lejen për pilot, ndërkohë që akoma nuk e kishte marrë lejen e vozitjes.

Pas shkollës së mesme ai u regjistrua në një universitet të flotës ushtarake detare dhe mori pjesë në Luftën e Koresë duke fituar tri medalje nderi. Më pas ai vazhdoi shkollimin në inxhinierinë aeronautike dhe diplomoi në vitin 1955.

Ai u bë hero në gjithë botën, duke qenë se ishte njeriu i parë që shkeli në hënë.

Kur bëri hapin e famshëm më 20 korrik të vitit 1969 në hënë, ai e tha një fjali e cila është cituar në mbarë botën: “Ky është një hap i vogël për njeriun, por një hap i madh për njerëzimin”.