Ndalet zemra e koreografit të njohur Agron Aliaj

Ka ndërruar jetë koreografi i njohur shqiptar Agron Aliaj.

Koreografi me një karrierë 50-vjeçare në Teatrin e Operës dhe Baletit u aksidentua më 7 mars teksa po dilte nga TKOB, ku po zhvillonte provat për premierën “Plaga e dhjetë e Gjergj Elez Alisë.

Burime nga QSUT bënë të ditur se profesori vdiq rreth orës 08:30 minuta të mëngjesit të djeshëm, në moshën 79- vjeçare.

Prej ditës së aksidentit Aliaj ndodhej në trajtim intensiv për shkak të dëmtimeve të rënda që kishte marrë në shtyllën kurrizore.

Familjarët akuzuan autoritetet e ministrisë së Shëndetësisë për indiferentizëm dhe burokraci të cilat mund ti merrnin jetën njeriut të tyre, ndërkohë që ministria e Shëndetësisë deklaroi se një ndërhyrja kirurgjikale mund ti shkaktonte një paralizë të përgjithshme pasi kishte dëmtuar shtyllën kurrizore dhe trurin.

Homazhet do të zhvillohen nesër në TKOB nga ora 12:00 deri në orën 14:00.

Aksidenti fatal

Mbrëmjen e 7 marsit 2012, baletmaestro u përplas nga një makinë sapo kishte lënë provat në Teatrin e Operës dhe Baletit dhe ishte duke kapërcyer rrugën pranë Teatrit kur është goditur nga një automjet Audi A6.

Familjarët dhe artistët përsëritën apele të shpeshta për shpëtimin e jetës së tij duke e transportuar jashtë për një mjekim të specializuar, por ministria e Shëndetësisë e kundërshtonte, pasi mund t’i rrezikonte jetën.