Ndahet nga jeta Zyrafete Jashari, ish drejtoreshë e QRA-së në Gjilan dhe një ndër juristet e para femër në regjionin tonë

Gjilan – Sot me datën 20 gusht 2022, është ndarë nga jeta Zyrafete Jashari, e cila për vite me radhë në Kosovën e pas luftës ishte në krye të Qendrës për Regjistrimin e Automjeteve në Gjilan, që në atë kohë mbulonte gjithë regjionin e Anamoravës, ku si drejtoreshë për vite me radhë dha kontribut të madh në ndërtimin dhe funksionalizimin e këtij institucioni nga vendorët.

E ndjera ishte e diplomuar në Fakultetin Juridik, pranë Universitetit të Prishtinës në vitet e 70-ta dhe ishte ndër juristet e para femra në regjionin e Anamoravës, profesion ky që shumë pak femra të asaj kohe e kishin zgjedhur.

Gjatë karrierës së saj deri në moshën e pensionit, e ndjera me ndershmëri dhe profesionalizëm ishte në shërbim të plotë të detyrave të punës dhe shumë e respektuar nga kolegët dhe qytetarët.

E ndjera ishte vajza e ish mësuesit tani të ndjerë Hazir Selimi (ish mësues klasor në shkollën fillore “Musa Zajmi” në Gjilan) dhe bashkëshortja e ish avokatit dhe gjyqtarit po ashtu tani të ndjerë Avni Jashari, ndërsa pas vetes ka lënë katër fëmijë, djalin Hamdi Jashari – avokat, vajzën Ditëmira Jashari-Shulemaja e cila jeton në perëndim, djalin Shpëtim Jashari – ekonomist dhe djalin tjetër Edon Jashari – fizioterpeut.

Familjarët përmes një postimi në Facebook, kanë njoftuar se varrimi i të ndjerës do të bëhet me datën 20 gusht 2022, ditë e shtunë, në orën 16:30 në varrezat e qytetit në Gjilan./rajonipress/

Shpërndaje.
© RAJONIPRESS