Ndahet nga jeta në moshën 96-vjeçare mësuesi dhe veterani i arsimit, Halil Mushica

Gjilan – Është ndarë nga jeta në moshën 96-vjeçare një nga figurat më të respektuara të arsimit, mësuesi dhe veterani i arsimit shqiptar, Halil Mushica.

Halil Mushica do të kujtohet si simbol i dijes, sakrificës dhe dashurisë së pakushtëzuar për arsimin dhe atdheun. Urtësia, kujtimet dhe fjala e tij mbeten një frymëzim i përhershëm për breza të tërë nxënësish që ai i edukoi me përkushtim të rrallë.

Ai ishte një njeri i pendës dhe mendjes së ndritur, patriot i përkushtuar dhe edukator shembullor, i cili për më shumë se katër dekada i shërbeu arsimit, duke ndriçuar rrugën e dijes për mijëra nxënës dhe duke i udhëhequr ata drejt vlerave kombëtare e njerëzore.

Jeta dhe vepra e tij përbëjnë një dëshmi të gjallë të përkushtimit të palëkundur ndaj dijes dhe kombit.

I lindur në vitin 1930, Mushica vinte nga një familje me traditë patriotike, çka ndikoi thellë në formimin e tij si veprimtar dhe aktivist i palodhur. Ai nuk qëndroi kurrë indiferent ndaj çështjeve kombëtare dhe historike, duke ngritur vazhdimisht zërin për ruajtjen e kujtesës kolektive.

Në veçanti, ai ishte një zë i fuqishëm në thirrjen për mosharresën e figurave të rëndësishme historike, si gjeneralmajori Veli Dedi dhe akademiku Ali Hadri.

Në rrëfimet e tij, Mushica shpesh theksonte rëndësinë e nderimit të këtyre personaliteteve, duke rikujtuar se figura e Veli Dedit është vlerësuar edhe ndërkombëtarisht, ndërsa në vendin tonë ende nuk ka marrë vëmendjen e merituar.

Me një kujtesë të jashtëzakonshme për ngjarjet historike, ai rrëfente për luftën e Kikës dhe Poliqkës, si dhe për shumë zhvillime të tjera të rëndësishme, duke i përcjellë ato tek brezat e rinj si një pasuri e çmuar historike.

Halil Mushica mbetet një figurë e ndritur e arsimit dhe e çështjes kombëtare, një emër që do të jetojë gjatë në kujtesën kolektive si shembull i dijes, përkushtimit dhe atdhedashurisë./rajonipress/