Ndahet nga jeta gazetarja Elife Sherifi, humbje e madhe për median dhe sportin në Gjilan

Gjilan – Me pikëllim të thellë është pritur lajmi për ndarjen nga jeta në moshë të re të gazetares Elife Sherifi, e cila la gjurmë të veçanta në fushën e gazetarisë dhe komunikimit sportiv. Në reagimin e saj, FC Drita ka shprehur ngushëllimet më të sinqerta për familjen Sherifi, miqtë dhe të gjithë ata që e njohën, duke e cilësuar humbjen e saj si të madhe dhe të pazëvendësueshme.

Ka lajme që nuk shkruhen lehtë, sepse pesha e tyre e tejkalon fjalën. Ndarja e parakohshme e Elife Sherifi është një nga ato dhimbje që nuk gjen menjëherë shprehje, një humbje që prek jo vetëm familjen e saj, por edhe gjithë ata që e njohën, punuan me të dhe e ndoqën rrugëtimin e saj.

E re në moshë, por e pjekur në profesion, ajo ishte zë i qetë, por i sigurt në gazetari – një penë që shkruante me ndjenjë dhe përgjegjësi, një shpirt që e deshi punën me pasion të rrallë. Prania e saj sillte energji, ndërsa angazhimi i saj linte gjurmë. Sot, ajo mungesë ndihet më shumë se kurrë, si një boshllëk që flet vetë për vlerën e saj.

Elifja njihej si një profesioniste e përkushtuar dhe e palodhur, e cila për vite me radhë kontribuoi në media dhe në jetën sportive lokale. Ajo ishte e lidhur ngushtë me FC Drita, fillimisht si mbështetëse e zjarrtë e klubit dhe më pas si zëdhënëse, detyrë që e ushtroi me përkushtim për më shumë se gjashtë vite.

Gjatë angazhimit të saj, Sherifi u dallua për profesionalizëm, korrektësi dhe dashuri të sinqertë për punën, duke fituar respektin e kolegëve, sportdashësve dhe komunitetit më gjerë.

Në reagimin e saj, FC Drita ka shprehur ngushëllimet më të sinqerta për familjen Sherifi, miqtë dhe të gjithë ata që e njohën, duke e cilësuar humbjen e saj si të madhe dhe të pazëvendësueshme.

Ndarja e parakohshme e Elife Sherifit lë një boshllëk të madh në gazetari dhe në sportin gjilanas, ndërsa kujtimi për të do të mbetet i gjallë përmes punës dhe përkushtimit që ajo tregoi gjatë jetës së saj./rajonipress/