Naim Pira viziton qendrat grumbulluese të grurit: Çmimet aktuale nuk i mbulojnë kostot e prodhimit

Viti – Drejtori për Bujqësi, Pylltari dhe Zhvillim Rural në Komunën e Vitisë, Naim Pira, ka zhvilluar një vizitë në qendrat grumbulluese të grurit në Viti dhe Kllokot, ku nga afër është njohur me ecurinë e fushatës së korrje-shirjeve, rendimentet e sivjetme, procesin e grumbullimit dhe çmimet me të cilat po pranohet gruri nga prodhuesit.

Gjatë takimeve me përfaqësuesit e pikave grumbulluese dhe fermerët, Pira vlerësoi përkushtimin dhe punën e bujqve, të cilët edhe këtë vit kanë investuar me seriozitet në prodhimin vendor, pavarësisht sfidave me të cilat janë përballur gjatë sezonit.

Megjithatë, ai shprehu shqetësimin se çmimet aktuale të grumbullimit të grurit mbeten të pafavorshme dhe nuk arrijnë të kompensojnë në masën e duhur kostot e prodhimit, duke rënduar pozitën ekonomike të fermerëve.

Drejtori Pira ritheksoi se Drejtoria për Bujqësi, Pylltari dhe Zhvillim Rural do të vazhdojë të jetë pranë fermerëve me programe mbështetëse dhe politika që synojnë fuqizimin e prodhimit bujqësor dhe përmirësimin e kushteve për zhvillimin e sektorit të bujqësisë në Komunën e Vitisë. Ai theksoi se mbështetja e prodhuesve vendorë mbetet një nga prioritetet kryesore të institucioneve komunale./rajonipress/