Myslimanët e hebrenjtë bashkohen në mbrojtje të synetllëkut

Grupet evropiane të myslimanëve dhe hebrenjve kanë bashkuar forcat për të mbrojtur synetllëkun pasi një gjykatë rajonale gjermane vendosi kundër, duke e quajtur si një dëm trupor.

Sipas BBC-së, në një deklaratë të përbashkët thuhet se kjo praktikë është themelore për besimin e tyre, ndaj ata bëjnë thirrje që synetllëku të ketë mbrojtje ligjore.

Vendimi i gjykatës së Këlnit nuk aplikohet në të gjithë Gjermaninë. Vendimi është kritikuar edhe nga parlamenti i Izraelit.
Mijëra djem myslimanë e hebrenj në Gjermani bëhen synet çdo ditë.

Kjo deklaratë e pazakontë është nënshkruar nga disa grupime si Qendra Rabinikale e Europës, Parlamenti Hebre i Europës, Bashkimi Turko- Islamik i Gjermanisë, Qendra Islamike e Brukselit, etj.

Drejtuesit e këtyre organizatave takuan edhe drejtuesit e Parlamentit Europian dhe Bundestag-ut për të shprehur zemërimin e tyre për këtë vendim. Ata insistuan se parlamenti gjerman duhet të miratojë një ligj të qartë në mbrojtje të synetllëkut.
Korrespondenti i BBC thotë se qeveria gjermane është e shqetësuar për vendimin./Indeksonline/