Mustafës i këshillohet tërheqja nga kandidatura për kryeparlamentar

Vendosmëria apo kokëfortësia politike e tre liderëve të bllokut LDK, AAK dhe Nisma që sërish të provojnë zgjedhjen e Isa Mustafës në postin e kryetarit të Kuvendit, mund të çojë në shkelje të sërishme të Kushtetutës. Kështu të paktën mund të jetë epilogu në rast se Isa Mustafa përfundimisht vendos që të futet në rrethin vicioz dhe të rikandidohet nga blloku i treshes për postin e kryekuvendarit, ani pse Gjykata Kushtetuese e ka thënë qartë që nominimi për këtë post duhet të vijë nga Grupi më i madh Parlamentar.

Kryetarët e LDK-së në dy raste i kanë humbur betejat në Gjykatën Kushtetuese. Fillimisht, ishte Fatmir Sejdiu ai i cili me mbajtjen e dy posteve, atë të presidentit të shtetit dhe kryetarit të LDK-së, ishte cilësuar si shkelës i kushtetutës. Kurse më pas Isa Mustafa i cili ishte zgjedhur përmes procedurave jo kushtetuese në postin e kryetarit të Kuvendit më 17 korrik.

Andaj, insistimi i bllokut që Isa Mustafa të rikandidohet për kryetar të Kuvendit, duket se ka pas vetës edhe rrezikun e madh, pasi që në rast se PDK do t’i drejtohej sërish Kushtetueses dhe do të vërtetohej sërish shkelje procedurale e kushtetuese, atëherë Mustafës nuk do t’i mbetej mbase zgjidhje tjetër pos dorëheqja. E dorëheqja e tij, më pas mund të trondiste LDK-në dhe koalicionin e saj me AAK-në dhe Nisma…(Tribuna).