Mustafa mund ta braktisë Thaçin

Paralajmërohet hakmarrja e LDK-së ndaj PDK-së.Marrëveshja politike drejt dështimit

Sipas analistëve, për liderin e LDK-së, kryeministrin e Kosovës, nuk do të jetë befasi, nëse e prish koalicionin dhe e dështon realizimin e ambicies presidenciale të kreut të PDK-së

Në situatën, kur Kuvendi është në një krizë të thellë politike, me bojkotimin dhe veprimet e ndryshme penguese të punës nga ana e opozitës, ndërsa ka një pasiguri në sigurimin e dy të tretave të deputetëve për votimin e presidentit të ri të vendit, deklarimi i kryeministrit Isa Mustafa se megjithatë koalicioni i ka votat për ta bërë Thaçin president, nga analistët politikë po shihet si një mashtrim i madh, përmes të cilit LDK-ja po përgatitet t’ia kthejë mashtrimin e dikurshëm nga lideri i PDK-së, Hashim Thaçi, kur e la në opozitë LDK-në dhe nuk e përfilli marrëveshjen politike, nga e cila u zgjodh Atifete Jahjaga.

Analisti politik, Faik Krasniqi, thotë se tani të gjithë e dinë që Isa Mustafa është njeri i pabesë, prandaj edhe Thaçit mund t’ia kthejë atë pabesi, që ky i fundit dikur ia pati bërë LDK-së. “Kur Isa Mustafa thotë diçka, gjithmonë del e kundërta. Ai fillimisht e tradhtoi Fatmir Sejdiun, e tradhtoi edhe Behgjet Pacollin, para fushatës parazgjedhore. Kështu veproi edhe me koalicionin VLAN, të cilën në fund e tradhtoi, për hir të pushtetit dhe postit të kryeministrit, post për të cilin kishte marrëveshje me Ramush Haradinajn, që Haradinaj të zgjidhej kryeministër”, tha ai./kosova sot/