Mustafa: Mos ta mallkojmë Kosovën

Kryeministri i Kosovës, Isa Mustafa, ka kërkuar që bashkërisht ta zhvillojmë shtetin e Kosovës.

“Mos të mallkojmë shtetin e Kosovës, sepse e kemi bërë këtë shtet që ta zhvillojmë e t’i besojmë. Kemi qytetarë, të cilët e kanë përgjegjësinë e tyre që ta japin besimin, por edhe të kërkojnë përgjegjësi ndaj atyre që e drejtojnë këtë vend”, ka thënë Mustafa në inaugurimin e “Klubit të Prodhuesve të Kosovës” në Prishtinë.

Ai para prodhueseve vendorë ka deklaruar se Kosova ka biznese të shkëlqyeshme, të cilat mund të jenë konkurruese në tregun evropian. “Më pëlqen pozitivizmi sepse ne duhet një ditë të kthehemi dhe të flasim pozitivisht për vetveten, mos ta mallkojmë këtë shtet dhe këtë vend, sepse e kemi bërë këtë shtet që ta zhvillojmë dhe e kemi bërë këtë shtet që t’i besojmë dhe kemi qytetarë, të cilët e kanë përgjegjësinë e tyre që të japin besimin, por edhe të kërkojnë përgjegjësi ndaj atyre që e drejtojnë këtë vend. Themelimi i sotëm i këtij klubi të prodhuesve është një akt simbolik edhe i tetë vjetorit të Pavarësisë së Republikës së Kosovës, sepse mendoj që është mënyra më e mirë që ne ta shënojmë përvjetorin shumë të madh të pavarësisë së vendit tonë, nëpërmjet fuqizimit privat të prodhimit edhe nëpërmjet fuqizimit të ekonomisë sonë”, është shprehur Mustafa.

Shefi i ekzekutivit ka deklaruar Qeveria ka punuar që të bëjë reforma të caktuara për nxitjen e sektorit privat, veçmas sektorin e prodhimit. Sipas tij, duhet bërë ndryshimin e bilancit tregtar, të eksportohet më shumë dhe të bëhet përgatitje për eksport. Ai ka thënë se duhet shfrytëzuar përparësitë që jep nënshkrimi i Marrëveshjes për Stabilizim Asocimit, që prodhuesit e Kosovës të jenë konkurrent në tregun evropian, meqë kjo tashmë është e drejtë e tyre.

Ndërsa, kryetari i “Klubit të Prodhuesve të Kosovës”, Visar Kelmendi ka thënë se përmes këtij klubi, synojnë të ndryshojnë klimën e të bërit biznes./epoka e re/