Mustafa: Mbajtëm premtimin, ia shkurtuam mandatin qeverisë

Lideri i Lidhjes Demokratike të Kosovës (LDK), Isa Mustafa, ka thënë sot se kjo parti e ka mbajtur premtimin e dhënë për t’ia shkurtuar mandatin qeverisë.

“Dje e kemi realizuar premtimin tonë, duke e detyruar Qeverinë Thaçi 2 që ta kryej mandatin para kohe dhe këtë e kemi arritur nëpërmjet shpërndarjes së Kuvendit”, ka thënë Mustafa, gjatë një konference për medie.

Ai ka shtuar se pavarësisht presionit të madh, LDK-ja nuk ka lëshuar pe për vazhdimin e vendeve të rezervuara.

“Qeveria është rrezuar, mandati është shkurtuar dhe këtë e kemi mundësuar pa lëshuar pe, edhe pavarësisht presionit shumë të madh që kemi pasur që të bëhet zgjatja së paku edhe për një mandat e vendeve të rezervuara për minoritetet në Kuvendin e Kosovës. Kjo është një e arritur e mirë sepse nuk kemi lejuar që të ketë Ahtisari plus dhe që të hyjmë në procese, të cilat do të ishin të pakufi dhe të pakontrolluara sa i përket rregullimit kushtetuese dhe pasojave që do t’i kishim në të ardhmen lidhur me funksionimin e Kuvendit”, ka thënë Mustafa, duke u shprehur i bindur se LDK-ja do të jetë fituese e zgjedhjeve të 8 qershorit. /Telegrafi/