Mustafa : MAPL është ngutur

Gjilan – Pavarësisht letrës shpjeguese të Ministrisë së Administrimit të Pushtetit Lokal vendimi i Asamblesë Komunale rreth kushtëzimeve mbetet në fuqi tha Qemajl Mustafa.

Ministria e Administrimit të Pushtetit Lokal (MAPL) u ka dërguar komunave Gjilan e Kamenicë nga një letër shpjeguese ku thuhet se kushtëzimet për ofrimin e shërbimeve të qytetarëve nga ana e Komunave për kryerjen e obligimeve ndaj Ndërmarrjeve Publike, nuk kanë bazë ligjore dhe si të tilla nuk mund të aplikohen.

Në këtë letër thuhet se “kufizimi i shërbimeve nga komuna për qytetarët, bizneset dhe operatorët ekonomik që funksionojnë brenda territorit të saj me pagesën e faturave të mbeturinave për Ndërmarrjen Publike Komunale, është në kundërshtim me legjislacionin në fuqi të Republikës së Kosovës”.

Ministria e Administrimit të Pushtetit Lokal, duke u bazuar në legjislacionin në fuqi, kërkon nga organet komunale përkatësisht Kryetarët e Komunave dhe Kuvendet Komunale, që vendimet e tyre t’i nxjerrin në harmoni me legjislacionin në fuqi sqarohet në letër.

Por ,Qemajl Mustafa i befasuar nga kjo letër tha për rajonipress se shumë shpejt do të ketë një takim me ministrin e MAPL-së për të sqaruar deri në fund se ata janë ngutur dhe nuk kanë të drejtë sepse nëse aksionarët dhe menaxhmenti i komunës nuk përkujdeset atëherë kush do të duhej me u përkujdes për dhënien e mirë të shërbimeve qytetarëve të komunës tha Mustafa.

Sipas Mustafës shërbimet e mira dhe të bollshme jepen vetëm nga kompanitë vitale e funksionale e kjo është e mundur vetëm nëse qytetarët i kryejnë obligimet ndaj kompanive.

“Andaj askush nuk duhet të ketë hezitime, meqë vendimi i Asamblesë Komunale rreth kushtëzimeve mbetet ende në fuqi” tha Mustafa./rajonipress/

Shpërndaje.
© RAJONIPRESS