Muriqi ka vendosur për destinacionin e ardhshëm

Vedat Muriqi gjatë verës që vjen do të largohet nga Mallorca, ku u huazua për gjashtë muaj nga Lazio.

Sulmuesi kosovar po mundohet ta ndihmojë ekipin ishullor të mbetet në La Liga e më pas të rikthehet në Itali.

Mallorca nuk ka vendosur ta shfrytëzojë mundësinë e blerjes së kartonit të futbollistit, kështu që ai do të kthehet tek Lazio, e cila e mban kartonin e tij.

Por, ndërkohë “Biancocelesti” janë duke u munduar ta sistemojnë diku tjetër 28 vjeçarin, i cili dështoi në eksperiencën e tij prej një viti e gjysmë në kryeqytetin italian.

Lazio e vlerëson kartonin e ish-futbollistit të Rizesporit 12 milionë euro, shkruan mediumi italian “Lazio News 24”, përcjell “Gazeta Express”.

Por, drejtori sportiv, Igli Tare është i vetëdijshëm se do të jetë e vështirë që ndonjë klub t’i shpenzojë aq para për përfaqësuesin kosovar.

Tashmë dihet se lojtari dëshiron të rikthehet në Superligën turke, ku e pëlqejnë Fenerbahçe dhe Galatasaray.

Megjithatë, asnjëri klub nuk ka bërë ende ofertë zyrtare për prizrenasin.

Lazio po e pret presidentin e Fenerit, Ali Koç, i cili mund të prezantohet gjatë verës me një ofertë për ish-futbollistin e tij.

Muriqi ka kontratë me klubin nga Serie A deri në vitin 2025, ndërsa Lazio e kishte blerë atë nga Fenerbahçe për afro 20 milionë euro. /Gazeta Express/