Mundësia e lëvizjes së kufijve, Tahiri: Bëhet mirë për ne shqiptarët, bashkohemi në një komb

Ish-kryenegociatorja e Kosovës, Edita Tahiri, ka bërë me dije se nëse në kuadër të dialogut Kosovë – Serbi preken kufijtë do të përfitojnë shqiptarët.

Në profilin e saj zyrtar në rrjetin social Facebook, Tahiri ka shkruar se në këtë mënyrë do bashkohet kombi shqiptar.

“Kanë nisur spekulimet rreth bisedimeve paqësore Ukrainë-Rusi të udhëhequra nga Trump. Spekulime nga analistë pro-rus e pro- Serbi po afirmojnë idenë e ndryshimit të kufijve duke përfshirë edhe Ballkanin, pra mes Kosovës dhe Serbisë, mirëpo Trumpi e din mirë se nuk ka ndryshim kufijsh vetëm në një pjesë të Ballkanit sepse ato do të ndryshohen në gjithë Ballkanin, me paqe apo me luftë – në këtë rast bëhet mirë për ne shqiptarët sepse bashkohet kombi shqiptar, i ndarë tragjikisht që një shekull”, ka shkruar Tahiri.