Muhamet Kelmendi dyshohet për terrorizëm, akuzon Skënder Hysenin

Muhamet Kelmendi, anëtari i Kryesisë së Aleancës për Ardhmërinë e Kosovës, është arrestuar në Mitrovicë me dyshimin për përgatitjen e një sulmi terrorist në pjesën veriore të Mitrovicës, mëson Klan Kosova.Ai e ka akuzuar Ministrin e Punëve të Brendshme, Skënder Hysenin, si porositës të arrestimit të tij.

Zëdhënësi i AAK-së, Ernest Luma, e ka konfirmuar për Klan Kosovën arrestimin e tij dhe ka thënë se ai po mbahet në njësitin Antiterror për Krime të Rënda në Prishtinë.

Në momentin e arrestimit Kelmendi ishte bashkë me dy miq të tij, ish ushtarë të UÇK-së, identiteti i te cilëve nuk është bërë i ditur.

Forcat speciale të Policisë së Kosovës, e kanë arrestuar Kelmendin gjatë rrugës së tij për në ceremoninë e rivarrimit të eshtrave të Isa Boletinit.

Reagon AAK: Kelmendi u arrestua me pretekst krejt të pakuptimtë

Aleanca për Ardhmërinë e Kosovës (AAK) është e befasuar me ndalimin e anëtarit të kryesisë së partisë dhe profesorit të nderuar, Muhamet Kelmendi, nga policia e Kosovës, sot në Mitrovicë.
AAK thotë se “Kelmendi u ndalua befas, me pretekst krejt të pakuptimtë për veprimtarinë e tij, derisa po udhëtonte në Boletin, në ceremoninë e rivarrimit të eshtrave të Heroit të Kombit Isa Boletini”.

AAK konsideron se profesori i respektuar, Muhamet Kelmendi, asnjëherë dhe në asnjë rrethanë nuk do të përfshihej në vepra, me pretekstin e të cilave është ndaluar sot nga Policia e Kosovës.

“Profesor Muhamet Kelmendi është anëtar shumëvjeçar i Aleancës, veprimtar i hershëm në të gjitha proceset për lirinë dhe pavarësinë e Kosovës, kurse pas çlirimit ishte deputet dhe pjesëmarrës i hartimit të shumë akteve ligjore e kushtetuese në shtetndërtimin e vendit”, thuhet në reagimin e AAK-së.

Arrestohet Muhamet Kelmendi i AAK-së

Para pak çastesh është arrestuar në hyrje të Mitrovicës, anëtari i Kryesisë së Aleancës për Ardhmërinë e Kosovës, Muhamet Kelmendi.

Ai u prangos bashkë me dy persona të tjerë, transmeton Klan Kosova.

Ndërkohë, edhe vetura me të cilin udhëtonte Kelmendi është konfiskuar nga policia.