MSH dhe AKPM: Barnat në shitje janë plotësisht të sigurta

Prishtinë – Ministria e Shëndetësisë dhe Agjencia e Kosovës për Produkte Mjekësore edhe njëherë i siguron qytetarët e vendit se cilësia e produkteve medicinale që cilat në mënyrë legale gjenden në shitje me pakicë dhe shumicë në tregun e Kosovës është e garantuar.

Me anë të një komunikate, MSH dhe AKPM informojnë opinionin se sot, pas një inspektimi me prioritet që është bërë, është vërtetuar se asnjë sasi e produkteve medicinale që kanë qenë në karantinë në subjektin Prima Pharm, nuk gjendet në shitje në barnatoret apo depot farmaceutikë në Kosovë. Pra tërë kjo sasi ende vazhdon të jetë në karantinë dhe spekulimet se qytetarët po përdorin barna të ndaluara apo të karantinuara nuk qëndrojnë.

Megjithëkëtë, thuhet në komunikatë, duke qenë të vetëdijshëm për pozitën dhe përgjegjësinë që ka ky institucion lidhur me shëndetin publik të qytetarëve, Inspektorati Farmaceutik ka marrë mostrat e nevojshme për të bërë analizën laboratorike të këtyre produkteve.