MPB e Maqedonisë së Veriut konfirmon vdekjen e tre personave nga Kosova

Ministria e Punëve të Brendshme e Maqedonisë së Veriut ka konfirmuar se rreth orës 01:00 të së hënës (20 korrik 2026) janë gjetur tre persona të vdekur në një veturë të përmbysur.

Sipas MPB-së, më 19 korrik, rreth orës 22:35, në SPB Shkup është raportuar se në rrugën nga Pikëkalimi Kufitar Bllacë drejt Shkupit ndodhej një automjet i përmbysur i markës “Mercedes” me targa gjermane.

“Menjëherë në vendin e ngjarjes janë dërguar zyrtarë policorë, të cilët kanë konstatuar se në automjet ndodheshin tre persona të pajetë, një mashkull dhe dy femra. Vdekjen e ka konstatuar një ekip i Ndihmës së Shpejtë Mjekësore”, thuhet në njoftimin e MPB-së.

Autoritetet maqedonase bëjnë të ditur se më herët, rreth orës 13:40, në Stacionin Policor Bit Pazar, një shtetas i Kosovës kishte raportuar zhdukjen e tre personave. Kontakti i fundit me ta ishte më 18 korrik, rreth orës 22:15, kur ndodheshin në Aeroportin e Shkupit.

Mediat në Maqedoninë e Veriut, përfshirë Alsat, raportojnë se vetura e përmbysur i përkiste tre shtetasve të Kosovës, të cilët ishin raportuar të zhdukur.

Sipas njoftimeve të familjarëve, bëhet fjalë për Ejup Tërnavën, Cennet Tërnavën dhe Fatmire Shabanin, të cilët ishin parë për herë të fundit mbrëmjen e së shtunës, rreth orës 22:00, në Shkup, pasi ishin nisur nga Aeroporti i Shkupit.

Familjarët kishin kërkuar ndihmë për gjetjen e tyre, ndërsa identiteti i viktimave ende nuk është konfirmuar zyrtarisht nga autoritetet kompetente. Hetimet për zbardhjen e rrethanave të aksidentit janë në vazhdim.