Moyes: Januzaj është i veçantë

Lëvdatave për supertalentin shqiptar, Adnan Januzaj, iu është bashkuar edhe menaxheri i Manchester Unitedit, David Moyes.

Të shtunën mbrëma 18-vjeçari shënoi dy herë kundër Sunderlandit duke e kthyer ndeshjen në favor të Djajve të Kuq (2-1).

Në këtë mënyrë mesfushori i talentuar ndjek hapat e Ruud van Nistelrooyt, i cili ka shënuar dy herë në debutimin e tij, kurse Moyes nuk ka hezituar ta krahasojë edhe me Wayne Rooneyn.

“Më kujtohet debutimi që i dhashë Waynet (te Evertoni), si dhe Ross Barkleyt, ndërsa Adnani ka padyshim të njëjtin kualitet. Ai është një top-lojtar”.

“Kam dashur ta angazhoj para dy ose tri javësh, por për arsye të ndryshme nuk u realizua. Mendova se sot (e shtunë) ishte momenti i duhur, ai ka qenë shumë i mirë, ishte vështirë që ta ndalnin”.

“Ai do të jetë një talent i shkëlqyer, është i veçantë, shënon gola, ka aftësi me top. Por do ta mbajmë me këmbët në tokë dhe shpresojmë të mësohet (me suksesin)”, është shprehur trajneri për Sky Sports. /Telegrafi/