Mosbindja e Kurtit – Zyra e BE-së: Pavarësia e gjyqësorit dhe prokurorisë është gur themeli i shtetit ligjor dhe duhet të respektohet në çdo kohë

Zyra e Bashkimit Evropian në Kosovë kanë folur për Gazetën Express lidhur me shpërfilljen që kryeministri i Kosovës dhe kreu i VV-së, Albin Kurti, po ia bënë sistemit të drejtësisë në vend, duke mos iu përgjigjur as thirrjes së Prokurorisë Speciale e as urdhrit të Gjykatës Themelore të Prishtinës për t’u paraqitur para hetuesisë për rastin e rezervave shtetërore.

Besnik Velija

Zëdhënsja e Zyrës së BE-së, Ioanna Lachana, ka thënë se pavarësia e gjyqësorit dhe prokurorisë është gur themel për një shtet ligjor dhe duhet respektuar. Zyra e BE-së thotë se gjyqësori dhe prokuroria mund të jenë subjekt i debatit publik e politik, por thonë se kritikat duhet të jenë të balancuara, gjithmonë me synimin e përmirësimit të sistemit.

“Pavarësia e gjyqësorit dhe prokurorisë është gur themeli i shtetit ligjor dhe duhet respektuar në çdo kohë. Gjyqësori dhe prokuroria në një sistem demokratik mund të jenë subjekt i shqyrtimit publik dhe debatit politik. Përderisa ka arsye për të diskutuar përmirësimet në sistemin e drejtësisë në Kosovë, të gjitha kritikat duhet të jenë të balancuara, duke synuar promovimin e llogaridhënies, integritetit dhe efikasitetit të sistemit të drejtësisë”, ka thënë Lachana për Gazetën Express.

Pa komentuar në detaje për rastin në fjalë, zëdhënësja e Zyrës së BE-së ka thënë se presin që çdo proces gjyqësor në Kosovë të jetë i drejtë, proporcional dhe i balancuar.

“Në parim, ne nuk komentojmë hetimet në vazhdim apo procedimet gjyqësore. Ne presim që çdo proces gjyqësor të jetë i drejtë dhe proporcional, duke balancuar interesat përkatëse”, ka thënë ajo.

Lidhur me mosbindjen e Kurtit ndaj Prokurorisë dhe Gjykatës, sot për Express kanë folur edhe nga Ambasada e Mbretërisë së Bashkuar, duke thënë se respekti për sundimin e ligjit është tipar kryesor i demokracisë së Kosovës.

“Respekti për sundimin e ligjit është një tipar kryesor i demokracisë së Kosovës. Ne kërkojmë nga ata që janë të përfshirë në këtë rast që të veprojnë në përputhje me Kushtetutën e Kosovës dhe në respekt të proceseve ligjore dhe të punojnë në atë që është interesi më i mirë i Kosovës”, kanë thënë për Gazetën Express nga Ambasada e Mbretërisë së Bashkuar./GazetaExpres/