Morina megjithatë mbetet në Dritë

Gjilan – Arbnor Morina do ta udhëheq Dritën deri në fund të sezonit. Kryesia e klubit gjilanas nuk e ka aprovuar vendimin e trajnerit kosovar për dorëheqje, prandaj ai do të vazhdojë ta drejtojë ekipin bardh e kaltër në xhirot e mbetura.

Këtë e ka konfirmuar vet ish trajneri i Prishtinës, Trepçës ’89 dhe Kosovës së Vushtrrisë për Express.

“Kam biseduar me drejtuesit e klubit, të cilët kanë insistuar që të mbetem në krye të shtabit teknik të Dritës, duke e konfirmuar kështu përkrahjen dhe mbështetjen që kanë ndaj meje. Për këtë, vendosa të vazhdoj deri në fund të sezonit”, deklaroi Morina, i cili është i kënaqur me ekipin që ka dhe me raportet fenomenale me lojtarët.

Ai nuk e përjashton mundësinë që ta drejtojë Dritën edhe sezonin e ardhshëm, nëse merren vesh me drejtuesit e klubit.

Morina e ofroi dorëheqjen nga ekipi i Dritës, pas humbjes së pësuar në shtëpi nga Besa, me rezultat 0:2.