Monitorohet në terren rindërtimi i kadastrit në pesë zona kadastrale

Kamenicë – Drejtoria për Pronë, Gjeodezi dhe Kadastër ka intensifikuar mbikëqyrjen e procesit të rindërtimit të kadastrit, përmes vizitave në terren në zonat ku tashmë kanë nisur punimet.

Drejtoresha Burbuqe Leka, e shoqëruar nga udhëheqësi i sektorit të gjeodezisë Ramush Ismaili dhe zyrtari Eshtref Keka, kanë zhvilluar një vizitë pune në zyrat përkatëse, ku po zbatohet projekti në pesë zona kadastrale.

Gjatë kësaj vizite, ata kanë parë nga afër ecurinë e punimeve dhe kanë dhënë udhëzime konkrete për stafin e angazhuar, me synim rritjen e efikasitetit dhe funksionalitetit të procesit.

Drejtoresha Leka theksoi se institucioni mbetet i përkushtuar për realizimin me sukses të këtij projekti, në përputhje me standardet profesionale, duke e cilësuar atë si të rëndësishëm për përditësimin dhe rregullimin e të dhënave kadastrale.

Ajo njëkohësisht u bëri thirrje qytetarëve që të përfshihen dhe të shfrytëzojnë këtë mundësi për të rregulluar çështjet pronësore në kuadër të këtij procesi./rajonipress/