Molliqaj: Nuk ia japim votën Haradinajt, pa u marrë vesh!

Sekretari organizativ i Lëvizjes Vetëvendosje, Dardan Molliqaj, ka thënë se nuk e mbështet marrëveshjen LDK-AAK-NISMA, por se jemi bashkë se nuk duhet do të bëjmë qeveri me Hashim Thaçin.

“E mbështesim me votë nëse merremi vesh çka nuk duhet me bo”, ka thënë ai në RTV21. “Sot kemi folë vetëm për postin e kryeministrit, e as të presidentit e as kryeparlamentarit”.

Sipas tij, kushtet e para janë lufta kundër korrupsionit – jo vetëm deklarative – pezullim i dialogut me Serbinë dhe pezullimi i privatizimit të tri ndërmarrjeve, si KEK, Trepça dhe PTK.

“Ne nuk japim mbështetje brenda një ore. E përshëndesim lajmin se qeveria nuk bëhet me PDK. Por, nuk japim votën pa u marrë vesh. Sepse nuk dalim jashtë konceptit tonë. Nuk jemi kundër PDK-së, por si ka qeverisur PDK-ja. Jemi për ndryshime, jo për zëvendësime”.

Veç kësaj, Molliqaj ka shprehur shqetësimin edhe rreth entuziazmit që po tregohet në kampet e tri partive nënshkruese të marrëveshjes.

“Ju as numrat nuk i keni”, ka thënë Molliqaj.

Në këtë kontekst, ai ka shtuar se Lëvizja Vetëvendosje, jo vetëm kësaj marrëveshjeje, por çdo marrëveshjeje tjetër, madje edhe të ndonjë anëtari të saj, nuk mund t’i ofrojë mbështetje blanko./Telegrafi/