Mirupafshim më 2016?

Gjykata Kushtetuese javën e ardhshme do ta publikojë vendimin për ndryshimet kushtetuese. Burime të Expressit thonë se kjo gjykatë pritet të konstatojë se shkurtimi i mandatit të Presidentes aktuale është në kundërshtim me Kushtetutën.

Kështu, Atifete Jahjaga mbetet në Presidencë deri në vitin 2016. Në PDK, thonë se do ta respektojnë vendimin, e LDK’ja i kërkon Jahjagës që t’i përmbahet marrëveshje së tre liderëve.

Në javën e tretë të këtij muaji, Gjykata Kushtetuese do të konfirmojë qëndrimin e Atifete Jahjagës se shkurtimi i mandatit të saj, përmes ndryshimeve kushtetuese, është në kundërshtim me dokumentin më të lartë juridik të shtetit.

Burime të Expressit brenda Gjykatës kanë treguar se argumentet e Presidentes për jokushtetutshmërinë e shkurtimit të mandatit të saj, qëndrojnë plotësisht.

Jahjaga ka përmendur tri argumente dhe tri nene të Kushtetutës që e pamundësojnë largimin e saj nga Presidenca deri në përfundimin e mandatit pesëvjeçar.

Në shkresën që e ka publikuar Express, të shtunën, thuhet se Amendamenti i Dhjetë që parasheh përfundimin e mandatit është në kundërshtim me Nenin 24, 45 dhe 91 të Kushtetutës.

Sipas Presidentes, marrja e mandatit të saj shkel të drejtat themelore të njeriut për të zgjedhur dhe për t’u zgjedhur; është në kundërshtim me ndarjen e pushteteve, pasi ndryshimet kushtetuese nxjerrin automatikisht aktvendim për një individ; si dhe shkarkimi i Presidentit nuk është paraparë të ndodhë me amendamente kushtetuese, siç kanë planifikuar të bëjnë deputetët.